ججز کی تنخواہیں بند کی جائیں اور بڑی بڑی عدالتی عمارتوں کو یونیورسٹیاں بنا دیا جائے

اسلام آباد(اردوپوائنٹ اخبار تازہ ترین۔20جون 2025) جنید اکبر خان نے مطالبہ کیا ہے کہ ججز کی تنخواہیں بند کی جائیں اور بڑی بڑی عدالتی عمارتوں کو یونیورسٹیاں بنا دیا جائے۔ تفصیلات کے مطابق چیئرمین پبلک اکاؤنٹس کمیٹی و پاکستان تحریک انصاف خیبرپختونخواہ کے صوبائی صدر جنید اکبر خان نے قومی اسمبلی میں اظہار خیال کرتے ہوئے حکومت اور عدلیہ کو انتہائی سخت الفاظ میں تنقید کا نشانہ بنایا۔

انہوں نے کہا کہ میں حکومت اور اسٹیبلشمنٹ کا شکرگزار ہوں کہ انہوں نے بتایا یہ ملک عدلیہ کے بغیر بھی چل سکتا ہے، 26 ویں آئینی ترمیم کے بعد عدلیہ کی یہ اوقات نہیں رہی کہ انصاف دیں۔ ان ججز کی ماؤں پر حیران ہوں کہ جنہوں نے ایسے حوصلے والے بچے پیدا کیے جو انصاف نہیں کر سکتے، ججز کی تنخواہیں بند کی جائیں اور بڑی بڑی عدالتی عمارتوں کو یونیورسٹیاں بنا دیا جائے۔

(جاری ہے)

انہوں نے مزید کہا کہ پہلی بار ایسی حکومت بنی ہے جسے زبردستی حکومت دی گئی ہے۔حکومت میں لائے ہوئے لوگوں اور عوام کو پتہ چل چکا ہے کہ ووٹ ڈالنے والا اہم نہیں ووٹ گننے والا اہم ہوتا ہے۔انہوں نے کہا کہ ان کو یقین ہے کہ ووٹ دینے والوں کی بجائے ووٹ گننے والوں کو خوش رکھنے سے ہی اقتدار ملے گا۔حکومت پر تنقید کرتے ہوئے جنید اکبرکا یہ بھی کہنا تھا کہ حکومت کی جانب سے دعویٰ کیا جاتا ہے معیشت میں بہتری آئی اور ملک ترقی کی راہ پر گامزن ہے۔

انہوں نے سوال کیا کہ اگر ملک میں ترقی ہو رہی ہے تو لوگ غربت کی لکیر سے کیوں نیچے جارہے ہیں؟۔ جبکہ قومی اسمبلی کے اجلاس سے گفتگو کرتے ہوئے ایم این اے صاحبزادہ حامد رضا نے حکومت کی تنقید پر جواب دیتے ہوئے کہا کہ اسرائیل سے متعلق عمران خان کا وہی موقف ہے جو بانی پاکستان کا تھا، آپ میں ہمت ہے تو ایک حکومتی بندے کو موبائل دیں، جیل جا کر عمران خان سے ایران سے متعلق موقف لا کر سب کو سنائے، ہمت ہے تو یہ کر کے دکھاو۔

پھر اتنی ہمت نہیں ہونی کہ اس بیان کو چینلز پہ چلا بھی سکو۔ انہوں نے مزید کہا کہ ہم پاکستانی اڈے ایران کے خلاف استعمال نہیں ہونے دیں گے۔ پاکستان کے اڈے کسی کی باپ کی جاگیر نہیں ہیں، اگر حکومت میڈیا پر چلنے والی خبروں کی تردید کر دے تو ہم ان کی تعریف کریں گے۔ اگر کسی نے پاکستان کی طرف میلی آنکھ سے دیکھا تو پاک فوج اسے منہ توڑ جواب دے گی۔ صاحبزادہ حامد رضا نے مزید کہا کہ یہاں کوئی بھی بات کرنے لگیں تو حکومتی لوگ بیچ میں عمران خان کو لے آتے ہیں۔ بجٹ پر بات کرنے لگیں یہ عمران خان عمران خان شروع کر دیتے ہیں۔ مزدور مرجائے تو خان صاحب، کسان مرجائے تو خان صاحب، ایران پر بات کریں تو خان صاحب۔ عمران خان کے ڈھائی سالوں کا حساب مانگتے ہوئے پہلے اپنے 40 سالوں کا تو حساب دو۔