Live Updates

گورنر ہائوس پشاور میں معرکہ حق، آپریشن بنیان المرصوص کی عظیم فتح کی مناسبت سے پروقار تقریب کا انعقاد کیا گیا

افواجِ پاکستان نے بھارتی جارحیت کا بھرپور اور منہ توڑ جواب دے کر ایک تاریخی مثال قائم کی، تمام پاکستانیوں اور امت مسلمہ کو پاک فوج پر فخر ہے،گورنرفیصل کریم کنڈی

اتوار 22 جون 2025 20:10

پشاور(اُردو پوائنٹ اخبارتازہ ترین - این این آئی۔ 22 جون2025ء)گورنر ہاوس پشاور میں معرکہ حق، آپریشن بنیان المرصوص کی عظیم فتح کی مناسبت سے پروقار تقریب کا انعقاد کیا گیا. گورنر خیبر پختونخوا فیصل کریم کنڈی تقریب کے میزبان تھے، ڈیجیٹل میڈیا فرم میکزم کے اشتراک سے منعقدہ تقریب میں سابق گورنر اقبال ظفر جھگڑا، انجنئر شوکت اللہ، اپوزیشن لیڈر ڈاکٹر عباداللہ، قومی وطن پارٹی کے صوبائی صدر سکندر حیات شیرپاؤ، ایرانی قونصل جنرل علی بنفشہ خواہ،اراکین صوبائی اسمبلی،ملک بھر سے سینئر ٹی وی اینکرز، سوشل میڈیا انفلونسرز، میڈیا پرسنز سمیت دیگر سیاسی و سماجی شخصیات شریک تھی.

تقریب میں گورنر خیبر پختونخوا نے بھارتی جارحیت میں زمہدارانہ صحافت پر سینئر اینکرز پرسنز، میڈیا پرسنز کو خراج تحسین پیش کرنے کیلئے خصوصی طور پر مدعو کیا اور انہیں ایوارڈز پیش کئے۔

(جاری ہے)

تقریب سے خطاب کرتے ہوئے گورنر نے کہا کہ انکے لئے یہ اعزاز کی بات ہے کہ آج انہوں نے اپنی اور خیبرپختونخوا کے عوام کیجانب سے گورنر ہاؤس میں اس پروقار تقریب کی میزبانی کی، آج کی تقریب اپنی مسلح افواج کو خراج تحسین پیش کرنے کیلئے منعقد کی گئی ہے، گورنر نے کہا کہ ملک بھر سے آنیوالے معزز مہمانوں کا گورنر ہاؤس تقریب میں شرکت پر مشکور ہوں، بھارتی جارحیت ہمارے لئے ایک امتحان تھا، انہوں نے کہا کہ افواجِ پاکستان نے بھارتی جارحیت کا بھرپور اور منہ توڑ جواب دے کر ایک تاریخی مثال قائم کی، تمام پاکستانیوں اور امت مسلمہ کو پاک فوج پر فخر ہے، فیصل کریم کنڈی نے کہا کہ بلاول بھٹو زرداری کی قیادت میں سفارتی وفد نے کامیابی سے اپنے ملک کا موقف پیش کیا، پہلی مرتبہ پاکستانی فیلڈ مارشل کی امریکی صدر نے مہمان نوازی کی جو ہماری سب سے بڑی سفارتی کامیابی ہے، یہ کامیابی نہ صرف عسکری بلکہ سفارتی میدان میں بھی پاکستان کی فتح ہی.

گورنر نے کہا کہ ہم کسی کو بھی سرزمینِ پاکستان کی طرف میلی آنکھ سے دیکھنے کی اجازت نہیں دیں گے، معرکہ حق میں صوبہ کی سیاسی جماعتوں کے قائدین کے مثبت کردار کی مثال نہیں ملتی،گورنر نے کہا کہ ہمارے میڈیا نے ذمہ دارانہ کردار ادا کر کے عالمی دنیا کو بہترین پیغام دیا، بھارتی جارحیت کیخلاف شاندار فتح پوری قوم کے اتحاد کی بدولت ممکن ہوئی، خیبرپختونخوا کے عوام کا بھی مشکور ہوں جو بھارتی جارحیت کیخلاف پاک فوج کے شانہ بشانہ کھڑے رہی. گورنر نے کہا کہ اسرائیلی حملہ کیخلاف ایرانی حکومت و ایرانی عوام کیساتھ کھڑے ہیں، باطل کیخلاف فتح ہمیشہ حق کی ہوتی ہے اور ایران ضرور فتح سے ہمکنار ہوگا-