شہدا کا خون ہماری قومی قوت کی بنیاد ہے، شہداء کے احسانات کا بدلہ کبھی نہیں چکا سکتے ، فیلڈ مارشل عاصم منیر

میجر سید معیز عباس شاہ نے دشمن کے خلاف دلیری سے لڑتے ہوئے جان کا نذرانہ پیش کیا،شہید کی یہ عظیم قربانی بہادری، ایثار اور حب الوطنی کی اعلیٰ ترین روایتوں کی مظہر ہے، چیف آف آرمی سٹاف فیلڈ مارشل کا شہید میجر سید معیز عباس شاہ کو خراج عقیدت پیش

فیصل علوی بدھ 25 جون 2025 13:30

شہدا کا خون ہماری قومی قوت کی بنیاد ہے، شہداء کے احسانات کا بدلہ کبھی ..

راولپنڈی(اردوپوائنٹ اخبار تازہ ترین۔25جون 2025)چیف آف آرمی سٹاف فیلڈ مارشل عاصم منیر کاکہنا ہے کہ شہدا کا خون ہماری قومی قوت کی بنیاد ہے، شہداء کے احسانات کا بدلہ کبھی نہیں چکا سکتے، میجر سید معیز عباس شاہ نے دشمن کے خلاف دلیری سے لڑتے ہوئے جان کا نذرانہ پیش کیا،پاک فوج کے شعبہ تعلقات عامہ (آئی ایس پی آر) کی جانب سے جاری بیان میں بتایا گیا کہ شہید میجر سید معیز عباس شاہ کی نماز جنازہ راولپنڈی میں ادا کر دی گئی۔

نمازجنازہ میں شرکت کے بعد چیف آف آرمی سٹاف فیلڈ مارشل عاصم منیرنے شہید میجر سید معیز عباس شاہ کو خراج عقیدت پیش کرتے ہوئے کہا کہ دشمن کی شدید مزاحمت کے باوجود بہادری سے لڑتے ہوئے جامِ شہادت نوش کیا اور فرض کی ادائیگی میں اپنی جان قربان کرکے بہادری، قربانی اور حب الوطنی کی اعلیٰ ترین روایات کو زندہ رکھا۔

(جاری ہے)

ان کی یہ عظیم قربانی بہادری، ایثار اور حب الوطنی کی اعلیٰ ترین روایتوں کی مظہر ہے۔

پوری قوم غم اور فخر کے جذبات کے ساتھ متحد ہے اور وطن کے دفاع کیلئے ان کی حتمی قربانی کو سلام پیش کرتی ہے۔آئی ایس پی آر کے مطابق فیلڈ مارشل سید عاصم منیر نے گفتگو کرتے ہوئے مزید کہا کہ ہم اپنے شہداء کے ہمیشہ کیلئے مقروض ہیں۔ ہمارے شہداء کا لہو ہی ہماری قوم کی طاقت کی بنیاد ہے۔پوری قوم اُن کی شہادت پر غمزدہ بھی ہے اور ان پر فخر بھی کرتی ہے۔

ہم اپنے شہدا کے احسانات کا بدلہ کبھی نہیں چکا سکتے، ہمارے شہداء کا خون ہماری قومی قوت کی بنیاد ہے۔شہید میجر معیز عباس نے اپنی جان قربان کر کے اس عزم کو زندہ رکھا کہ پاکستان کے دشمن چاہے اندرونی ہوں یا بیرونی، ان کے ناپاک عزائم کو ناکام بنانے کیلئے ہماری افواج ہر دم تیار ہیں۔ان کا کہنا تھا کہ پاک فوج اور پوری قوم اس بہادر سپوت کو سلام پیش کرتی ہے جنہوں نے ملک کی سلامتی پر اپنی جان نچھاور کر دی۔

شہید کی قربانی ہمیشہ یاد رکھی جائے گی۔قبل ازیں جنوبی وزیرستان میں فتنۃ الخوارج کے خلاف بہادری سے لڑتے ہوئے شہید میجر سید معیز عباس شاہ کی نماز جنازہ ادا کردی گئی، فیلڈ مارشل سید عاصم منیر، وفاقی وزیر داخلہ واعلیٰ عسکری و سول افسران و جوانوں نے شرکت کی،چکوال کے رہائشی 37 سالہ میجر سید معیز عباس شاہ کی نماز جنازہ چکلالہ گیریژن راولپنڈی میں ادا کی گئی۔بعدازاں شہید کی میت ان کے آبائی علاقے روانہ کر دی گئی جہاں انہیں مکمل فوجی اعزاز کے ساتھ سپردِ خاک کیا جائے گا۔