ایران اسرائیل جنگ بندی میں پاکستان کا بھی کردار، امریکی صدر، فیلڈ مارشل کی ملاقات میں پیشرفت ہوئی‘ خواجہ سعد رفیق

یہ جنگ بندی ایران اور اسرائیل ہی نہیں بلکہ امریکہ سمیت تینوں کے بیچ ہوئی، روس اور قطر کا کردار اہم ترین ہے ‘ سینئر رہنما (ن ) لیگ

بدھ 25 جون 2025 16:41

ایران اسرائیل جنگ بندی میں پاکستان کا بھی کردار، امریکی صدر، فیلڈ مارشل ..

لاہور (اُردو پوائنٹ اخبارتازہ ترین - این این آئی۔ 25 جون2025ء) پاکستان مسلم لیگ (ن) کے سینئر رہنما وسابق وفاقی وزیر خواجہ سعد رفیق نے دعویٰ کیا ہے کہ ایران، اسرائیل جنگ بندی کی کوششوں میں پاکستان بھی مسلسل شریک رہا جبکہ امریکی صدر ڈونلڈ ٹرمپ کے ساتھ فیلڈ مارشل عاصم منیر کی ملاقات میں بھی اس حوالے سے پیشرفت ہوئی۔سماجی رابطے کی ویب ایکس پر جاری اپنے ایک بیان میں انہوں نے کہا کہ ایران اسرائیل جنگ بندی ایک تجزیہ ، یہ جنگ بندی ایران اور اسرائیل ہی نہیں بلکہ امریکا سمیت تینوں کے بیچ ہوئی، روس اور قطر کا کردار اہم ترین ہے۔

سابق وفاقی وزیر نے کہا کہ پاکستان ،ترکی ،سعودی عرب و دیگر ممالک بھی ان کوششوں میں مسلسل شریک رہے، کوئی مانے یا نہ مانے، امریکی صدر اور پاکستان کے فیلڈ مارشل عاصم منیر کی ملاقات میں بھی اس جنگ بندی کے حوالہ سے بات چیت اور پیش رفت ہوئی۔

(جاری ہے)

انہوں نے کہا کہ اس ملاقات میں امریکی وزیر خارجہ اور مشرق وسطی میں امریکی نمائندے بھی موجود تھے، بھاری جانی مالی اور دفاعی نقصانات کے باوجود ایران نے جارحیت کے سامنے سر نہیں جھکایا۔سعد رفیق نے کہا کہ امریکہ اور اسرائیل، ایران کو سرنڈر کروانے، جھکانے، اندرونی بغاوت کروانے اور ایٹمی پروگرام پر آگے بڑھنے سے روکنے میں مکمل ناکام رہے، اسرائیل کا ناقابل تسخیر ہونے کا بھرم بھی ٹوٹ گیا۔