Live Updates

پاک ایران گیس پائپ لائن منصوبے پر اب عملدرآمد شروع ہوجانا چاہیے

پاکستان اور ایران کے درمیان بڑے استحکام کی ضرورت ہے، گریٹر اسرائیل منصوبے کو شکست ہوئی ہے، عالم اسلام کو عسکری اقتصادی علم، ٹیکنالوجی کے میدان میں اکھٹا ہونا ہوگا۔ نائب امیر جماعت اسلامی لیاقت بلوچ

ثنااللہ ناگرہ جمعرات 26 جون 2025 19:30

پاک ایران گیس پائپ لائن منصوبے پر اب عملدرآمد شروع ہوجانا چاہیے

لاہور (اُردو پوائنٹ اخبارتازہ ترین۔ 23 جون 2025ء ) نائب امیر جماعت اسلامی لیاقت بلوچ نے کہا ہے کہ گریٹر اسرائیل منصوبے کو فی الحال شکست ہوئی ہے۔ عالم اسلام کو عسکری اقتصادی علم، ٹیکنالوجی کے میدان میں اکھٹا ہونا ہوگا۔ ایران پاکستان کے درمیان بڑے استحکام کی ضرورت ہے۔ اب پاک ایران گیس پائپ لائن منصوبے پر عملدرآمد ہونا چاہیے۔ غزہ میں 60 ہزار افراد شہید ہوئے، غزہ کے عوام نے قربانیاں دے کر دنیا میں بیداری پیدا کی۔

انھوں نے کہا کہ ایران کی قیادت اور عوام نے امریکی اسرائیلی حملے میں جرات و استقامت دکھائی ہے، حماس نے اسرائیلی منصوبے کو ملیامیٹ کر دیا۔لیاقت بلوچ کا لاہور ہائیکورٹ بار ایسوسی ایشن، آواز خلق اور ہیومن رائٹس سوسائٹی آف پاکستان کے زیر اہتمام کراچی شہدا ہال لاہور ہائی کورٹ میں بعنوان امریکہ اسرائیل کا ایران پر حملہ اور پاکستان کیلئے خطرات کے موضوع پر خطاب کرتے ہوئے کیا۔

(جاری ہے)

اس موقع پر ڈاکٹر اصغر مسعودی ڈی جی خانہ فرہنگ اسلامی جمہوریہ ایران، لاہور ہائیکورٹ بار کے صدر ملک آصف نسوانہ،صدر لاہور بار ایسوسی ایشن مبشر رحمن چوہدری، اشتیاق چوہدری ایڈووکیٹ اور اسلم زار ایڈووکیٹ بھی موجود تھے۔ دوسری جانب اسرائیل کے بے قابو ہوتے رویے پر خلیجی اتحادیوں نے تشویش کا اظہار کیا ہے۔ میڈیا رپورٹس کے مطابق خلیجی عرب ممالک کے اعلی حکام نے خبردار کیا ہے کہ ایران پر اسرائیل کے حالیہ حملے نے مشرق وسطی میں عدم استحکام کو بڑھا دیا ہے اور اسرائیل اب خود ایک غیر ذمہ دار قوت کے طور پر دیکھا جا رہا ہے، جو کسی بھی لمحے علاقائی امن کو تہہ وبالا کر سکتا ہے۔

ایک اعلی عرب سفارتکار نے اسرائیل کی جانب سے ایران پر حملے کو ناقابل معافی اور لاپرواہی پر مبنی قرار دیا ہے۔ ان کا کہنا ہے کہ اسرائیل، جو کبھی ایرانی ایٹمی خطرے کے خلاف محافظ سمجھا جاتا تھا، اب خود سب سے بڑا خطرہ بن چکا ہے۔ خلیجی ممالک کے نمائندوں کا کہنا تھا کہ اگرچہ ایران کے ایٹمی پروگرام کو تباہ کرنے کی اسرائیلی کوشش بعض حلقوں میں قابلِ ستائش سمجھی گئی لیکن اسرائیلی وزیراعظم بینجمن نیتن یاہو کی بے لگام عسکری حکمت عملی خطے کے لیے باعثِ تشویش ہے۔

ایک خلیجی اہلکار نے نام ظاہر نہ کرنے کی شرط پر دی ٹیلی گراف کو بتا یا کہ نیتن یاہو کو اب کوئی روکنے والا نہیں رہا۔ وہ غزہ، لبنان، شام اور اب ایران میں طاقت کا اندھا استعمال کر رہا ہے۔ اسرائیل کے بڑھتے ہوئے عسکری عزائم نے ابراہم معاہدوں کی کامیابی کو بھی خطرے میں ڈال دیا ہے۔