پاکستان میں پولیو کا ایک اور کیس سامنے آگیا، رواں سال کیسز کی تعداد 13 ہوگئی

جمعہ 27 جون 2025 19:16

اسلام آباد (اُردو پوائنٹ اخبارتازہ ترین - این این آئی۔ 27 جون2025ء)پاکستان میں پولیو کا ایک اور کیس سامنے آگیا جس کے بعد رواں سال رپورٹ ہونے والے پولیو کیسز کی تعداد 13 ہوگئی۔قومی ادارہ صحت کے ریجنل ریفرنس لیبارٹری برائے پولیو کی جاری کردہ پریس ریلیز کے مطابق خیبر پختونخوا کے ضلع ٹانک میں پولیو وائرس کا ایک نیا کیس سامنے آیا ہے، جو اس سال صوبے سے رپورٹ ہونے والا ساتواں کیس ہے، جبکہ ملک بھر میں مجموعی تعداد 13 ہو گئی ہے۔

پاکستان دنیا کے ان دو آخری ممالک میں شامل ہے جہاں پولیو وائرس تاحال مقامی سطح پر موجود ہے، دوسرا ملک افغانستان ہے۔عالمی سطح پر وائرس کے خاتمے کی کوششوں کے باوجود سیکیورٹی مسائل، ویکسین لگوانے میں ہچکچاہٹ اور غلط معلومات کی وجہ سے پیشرفت میں رکاوٹ آرہی ہے۔

(جاری ہے)

رواں سال پاکستان میں اب تک تین قومی انسداد پولیو مہمات فروری، اپریل اور مئی میں چلائی جاچکی ہیں، تاہم پولیو کے خاتمے کی مہمات اکثر سیکیورٹی چیلنجز کا سامنا کرتی ہیں۔

قومی ادارہ صحت کے مطابق یہ کیس ٹانک کے یونین کونسل اماخیل سے تعلق رکھنے والے 18 ماہ کے بچے میں رپورٹ ہوا۔انہوں نے کہا کہ اس تازہ ترین کیس کے ساتھ 2025 میں پاکستان میں پولیو کیسز کی مجموعی تعداد 13 ہو گئی ہے، جن میں سے 7 خیبر پختونخوا، 4 سندھ اور ایک ایک کیس پنجاب اور گلگت بلتستان سے رپورٹ ہوا ہے۔یہ کیس ایسے وقت میں سامنے آیا ہے جب صرف ایک ہفتہ قبل خیبر پختونخوا کے ضلع بنوں میں 33 ماہ کے بچے میں سال کا چھٹا پولیو کیس سامنے آیا تھا، جبکہ گزشتہ ماہ بھی صوبے میں دو کیسز رپورٹ ہوئے تھے۔

مئی میں پاکستان نے اس سال کی تیسری انسداد پولیو مہم کا آغاز کیا، جس کا ہدف پانچ سال سے کم عمر کے 4 کروڑ 50 لاکھ بچوں کو ویکسین دینا تھا، حکومت نے سال کے اختتام تک پولیو کے خاتمے کے عزم کا اعادہ کیا ہے۔وفاقی وزیر صحت سید مصطفی کمال نے مئی میں ایک تقریب سے خطاب کرتے ہوئے کہا تھا کہ پولیو کے خلاف جنگ میں تمام متعلقہ فریقین بشمول قانون نافذ کرنے والے اداروں نے بے مثال قربانیاں دی ہیں۔انہوں نے مزید کہا تھا کہ یہ مشن اٴْس وقت تک جاری رہے گا جب تک پولیو کا مکمل خاتمہ نہیں ہو جاتا۔