Live Updates

عمران خان سزا یافتہ مجرم ہیں، ان کیخلاف کوئی سیاسی مقدمہ نہیں، احسن اقبال

پیر 7 جولائی 2025 22:38

اسلام آباد(اُردو پوائنٹ اخبارتازہ ترین - آن لائن۔ 07 جولائی2025ء)وفاقی وزیر منصوبہ بندی احسن اقبال نے کہا ہے کہ پی ٹی آئی حکومت کو آئینی طریقے سے ہٹایا گیا، تحریک عدم اعتماد سے قبل ہی خزانہ خالی کا اعلان ہوگیا تھا، کچھ لوگ اکٹھے ہوکر اسلام آباد پر چڑھائی کرتے ہیں، کچھ لوگ ریاست کے خلاف مہم چلارہے ہیں، پی ٹی آئی کے کچھ لوگ خود ساختہ جلاوطن ہیں۔

(جاری ہے)

میڈیا سے گفتگو کرتے ہوئے احسن اقبال نے کہا کہ اللہ نے بھارت کے خلاف پاکستان کو بڑی کامیابی عطا کی، امریکی صدر ڈونلڈ ٹرمپ نے ہمارے فیلڈ مارشل کو دعوت دی، بھارت کے بجائے پی ٹی آئی نے احتجاج کیا، بانی پی ٹی آئی عمران خان سزا یافتہ مجرم ہیں، بانی پی ٹی آئی کے خلاف کوئی سیاسی مقدمہ نہیں۔وفاقی وزیر نے مزید کہا کہ ملک میں اس وقت مخلوط حکومت ہے، مسائل کے حل کے لیے ہم سب کو مل کرکوشش کرنا چاہیئے، حکومت کے ساتھ تعاون کرنے والوں کو ویلکم کریں گے، ریاست کو نقصان پہنچانے والوں سے سختی سے نمٹیں گے، ہر ریاست اپنے مفادات کا تحفظ کرتی ہے۔