بیرون ملک سے ڈی پورٹ بھکاریوں کی گرفتاری یقینی بنائی جائے، وزیرداخلہ

جعلی ادویات کے کاروبار میں ملوث لوگوں کی اصل جگہ جیل ہے،محسن نقوی کا اجلاس سے خطاب

منگل 8 جولائی 2025 18:10

بیرون ملک سے ڈی پورٹ بھکاریوں کی گرفتاری یقینی بنائی جائے، وزیرداخلہ

کراچی (اُردو پوائنٹ اخبارتازہ ترین - این این آئی۔ 08 جولائی2025ء)وفاقی وزیرداخلہ محسن نقوی نے کہا ہے کہ بیرون ملک سے ڈی پورٹ ہوکر آنے والے بھکاریوں کی گرفتاری یقینی بنائی جائے،مفرور ایجنٹس کو دیگر صوبوں کے تعاون سے گرفتار کیا جائے، جعلی ادویات کے کاروبار میں ملوث لوگوں کی اصل جگہ جیل ہے۔ان خیالات کا اظہار انہوں نے منگل کو ایف آئی اے کراچی زون کے اجلاس کی صدارت کرتے ہوئے کیاجس میں ایڈیشنل ڈائریکٹر جنرل ایف آئی اے سائوتھ مجاہد اکبر خان، ڈائریکٹر ایف آئی اے کراچی زون نعمان صدیق، ڈپٹی ڈائریکٹر اینٹی منی لانڈرنگ،ڈپٹی ڈائریکٹر امیگریشن،ڈپٹی ڈائریکٹر اینٹی کرپشن ، تمام اسسٹنٹ ڈائریکٹرز اور ایف آئی اے سائوتھ کے حکام بھی شریک تھے۔

ڈائریکٹر کراچی زون نعمان صدیق نے وزیر داخلہ کو بریفنگ دی اور انہیں ایف آئی اے کراچی زون کی کارکردگی اور ایشوز سے آگاہ کیا۔

(جاری ہے)

وزیر داخلہ نے حوالہ ہنڈی مافیا کیخلاف موثر کریک ڈاؤن کا حکم دیتے ہوئے کہا کہ اس میں ملوث بڑے بڑے لوگوں پر ہاتھ ڈالا جائے،کسی کا دباؤ قبول کئے بغیر مافیا کے خلاف بلا امتیاز کارروائی کی جائے۔ محسن نقوی نے بھکاریوں کو بیرون ملک بھجوانے والے ایجنٹ مافیا کی سرکوبی کا حکم دیتے ہوئے کہا کہ بھکاری مافیا پاکستان کے امیج کو خراب کر رہا ہے، ایجنٹس کے خلاف بلاامتیاز ایکشن نظر آنا چاہیے،مفرور ایجنٹس کو دیگر صوبوں کے تعاون سے گرفتار کیا جائے۔

انہوںنے کہاکہ جعلی ادویات کا کاروبار کسی صورت برداشت نہیں کیا جائے گا ، اس مکروہ دھندے میں ملوث لوگوں سے آہنی ہاتھوں سے نمٹا جائے،جعلی ادویات کے کاروبار میں ملوث لوگوں کی اصل جگہ جیل ہے،انہوں نے نان کسٹم مصنوعات کے خلاف بھرپور کارروائی کی ہدایت بھی کی۔وزیرداخلہ نے 5 ہزار سے زائد ڈالر بیرون ملک لے کر جانے والے مسافروں کے خلاف سخت ایکشن دیتے ہوئے ایف آئی اے کو حکام کوہدایت کی ہے کہ ایسے افراد کیخلاف قانون کے مطابق بھرپور کارروائی کی جائے۔