شہیدبرہان وانی کو خراج عقیدت پیش کرنے اور پاک فوج سے اظہار یکجہتی کے لئے کراچی اور لاہور میں شاندار ریلیاں

کراچی (اُردو پوائنٹ اخبارتازہ ترین - اے پی پی۔ 08 جولائی2025ء) کل جماعتی حریت کانفرنس کی آزادجموں وکشمیر شاخ نے ممتازنوجوان کشمیری رہنمابرہان مظفر وانی کو ان کے نویں یوم شہادت پر خراج عقیدت پیش کرنے اور پاک فوج کے ساتھ اظہار یکجہتی کے لئے کراچی میں ایک شاندار ریلی کا انعقاد کیا جس میں لوگوں کی بڑی تعداد نے شرکت کی۔کشمیرمیڈیاسروس کے مطابق آرٹس کونسل سے پریس کلب تک ریلی کی قیادت کل جماعتی حریت کانفرنس کی آزادجموں وکشمیر شاخ کے کنوینر غلام محمد صفی نے کی جبکہ حریت رہنمائوں ایڈووکیٹ پرویز احمد شاہ ، سید یوسف نسیم،زاہد اشرف، شیخ عبدالماجد اوراجہ خادم حسین نے بھی ریلی میں شرکت کی۔

ریلی میں پیپلز پارٹی کے عامر غفار لون، مرکزی مسلم لیگ کے فیصل ندیم اوردیگر جماعتوں کے رہنمائوں نے بھی شرکت کی ۔

(جاری ہے)

مقررین نے ریلی سے خطاب کرتے ہوئے برہان مظفر وانی اور دیگر شہدائے کشمیر کوشاندار خراج عقیدت پیش کیا۔ انہوں نے کہاکہ شہداء کی قربانیوں کو رائیگاں نہیں جانے دیا جائے گا۔ انہوں نے جیلوں میں نظربند کشمیری رہنمائوں اورحریت پسند نوجوانوں کو بھی ان کی ثابت قدمی پر خراج تحسین اور سلام پیش کیا۔

مقرین نے کہاکہ بھارت کے خلاف تاریخی فتح سے پوری قوم کا سرفخر سے بلند ہوا۔ انہوں نے کہا کہ پاک فوج نے بھارتی جارحیت کا منہ توڑ جواب دے کراسے ایسا سبق سکھایا جو وہ ہمیشہ یاد رکھے گا۔ انہوں نے کہاکہ کشمیر یوں نے جدوجہد آزادی میں بے پنا ہ قربانیاں دی ہیں اوران کی جدوجہدکامیاب ہوکررہے گی۔ مقررین نے کہا کہ بھارت نے مظلوم کشمیریوں پر مظالم کے تمام ریکارڈ توڑ دیے ہیں لیکن وہ کشمیریوں کے جذبہ حریت کو دبانے میں بری طرح ناکام ہوچکا ہے۔

انہوں نے کہا کشمیر ی ماورائے عدالت قتل ، گرفتایاں ، نظربندیاں اوردیگر مظالم برداشت کررہے ہیں لیکن ان کا جذبہ حریت دن بدن بڑھتا جارہا ہے اور وہ بھارت سے ہرصورت میں آزادی چاہتے ہیں ۔ مقررین نے عالمی برادری سے مطالبہ کیا کہ وہ کشمیریوں سے کئے گئے اپنے وعدے پورے کرے اوربھارت کو مقبوضہ جموں وکشمیر میں آزادانہ اورمنصفانہ رائے شماری کرانے پر آمادہ کرے۔

دریں اثناء برہان وانی کے یوم شہادت پر کشمیرسنٹرلاہور کے زیراہتمام بھی ایک ریلی کاانعقادکیاگیا ۔ ریلی سے پاکستان پیپلز پارٹی کے رہنما غلام عباس میر، سینئرمسلم لیگی رہنماوسابق پارلیمانی سیکرٹری ڈاکٹرفرازانہ نذیر، حریت رہنما انجینئرمشتاق محمود، انچارج سنٹرانعام الحسن، پی ٹی آئی رہنما فاروق آزاد، مسلم لیگی رہنما قاضی انوار، سابق کونسلر حاجی اعجاز، ممتا ز ادیب پروفیسر نذربھنڈر،معروف مذہبی اسکالر علامہ فدا ء الرحمان حیدری، شیخ امجداقبال، نذیربیگ ودیگرنے خطاب کیا۔

مقررین نے کہا کہ برہان وانی ایک نظریہ، ایک علامت اور ایک ناقابل شکست حوصلے کا نام ہے۔ انہوں نے کشمیری نوجوانوں کی بھرپورقیادت کی اور انہیں اپنے وطن کی آزادی، حریت اور قابض بھارتی فوج کے خلاف جہاد کے لیے بھرپور انداز میں تیار کیا۔ شہید برہان وانی نے تحریک آزادی کشمیر کو نئی جہت، نئی روح اور ایک واضح سمت دی۔انہوں نے سوشل میڈیا کے ذریعے ایک جانب بھارتی فوج کے مظالم دنیا کے سامنے بے نقاب کئے اور دوسری جانب نوجوانوں کو جہاد کی ترغیب دی اور ان میں آزادی کی ایسی تڑپ پیدا کی جس نے بھارتی فوج کی راتوں کی نیند حرام کردی۔