سپیکر قومی اسمبلی سردار ایاز صادق کی قیادت میں پارلیمانی وفد کی آذربائیجان کے وزیر اعظم علی اسدوف سے ملاقات

بدھ 9 جولائی 2025 17:19

باکو(اُردو پوائنٹ اخبارتازہ ترین - این این آئی۔ 09 جولائی2025ء)سپیکر قومی اسمبلی سردار ایاز صادق کی قیادت میں پارلیمانی وفد نے آذربائیجان کے وزیر اعظم علی اسدوف سے باکو میں ملاقات کی۔ بدھ کوقومی اسمبلی سیکرٹریٹ کی جانب سے جاری بیان کے مطابق ملاقات کے دوران سپیکر سردار ایاز صادق نے صدر الہام علیوف اور سپیکر صاحبہ غفارووا سے حالیہ ملاقاتوں کو مثبت اور تعمیری قرار دیا۔

سپیکر سردار ایاز صادق نے ای سی او سربراہی اجلاس کے کامیاب انعقاد پر وزیراعظم آذربائیجان کو مبارکباد دی۔ سپیکرقومی اسمبلی سردار ایاز صادق نے کہا کہ وزیراعظم شہباز شریف کی ای سی او اجلاس میں شرکت دونوں ممالک میں یکجہتی اور خیر سگالی کی علامت ہے۔ انہوں نے مسئلہ کشمیر کے حوالے سے پاکستان کے موقف کی غیر متزلزل حمایت پر آذربائیجان سے اظہارِ تشکر کرتے ہوئے آذربائیجان کی جانب سے پاکستان میں 2 ارب ڈالر کی سرمایہ کاری کے اعلان کا خیر مقدم کیا۔

(جاری ہے)

سپیکر قومی اسمبلی نے دونوں برادر ممالک کی پارلیمانوں میں روابط کو فروغ دینے کی ضرورت پر زور دیتے ہوئے رواں سال ستمبر میں اسلام آباد میں سہ فریقی سپیکرز کانفرنس کی میزبانی کی تجویزپیش کی۔ملاقات میں آذربائیجان کے وزیر اعظم علی اسدوف نے کشمیر پر آذربائیجان کے اصولی موقف کا اعادہ کیا اورپاکستان کی جانب سے نگورنو کاراباخ تنازعہ پر حمایت پر پاکستان کا شکریہ ادا کیا۔وزیر اعظم علی اسدوف نے کہا کہ آذربائیجان اپنی خودمختاری اور علاقائی سالمیت پر کوئی سمجھوتہ نہیں کرے گا۔ملاقات میں دونوں ممالک کے مابین (پی ٹی ای) ترجیحاتی تجارتی معاہدہ کے نفاذ کا خیر مقدم کیا گیا۔