بانی پی ٹی آئی کے بیٹوں کے ذریعے فساد کرنے کی ہرگز اجازت نہیں دی جائیگی‘ عظمی بخاری

لاہور(اُردو پوائنٹ اخبارتازہ ترین - این این آئی۔ 10 جولائی2025ء)وزیر اطلاعات پنجاب عظمی بخاری نے کہا ہے کہ محرم الحرام کے دوران پنجاب حکومت کے انتظامات انتہائی شاندار اور منظم رہے۔ عالمی حالات کے تناظر میں اس سال محرم الحرام حساس تھا لیکن حکومتی حکمت عملی، علما کرام کی رہنمائی، اور عوام کے تعاون سے عشرہ بخیر و عافیت گزر گیا۔ مذہبی ہم آہنگی کی فضا قابلِ تحسین رہی، اور علما کی جانب سے وزیراعلی پنجاب کو ایوارڈ کے لیے نامزد کرنا اس ہم آہنگی کا ثبوت ہے۔

انہوں نے کہا کہ وزیراعلی پنجاب کے وژن کے مطابق "ستھرا پنجاب" کے بعد اب "سدھرا پنجاب" پروگرام کا آغاز کر دیا گیا ہے، جس کا مقصد پنجاب کو جرائم سے پاک بنانا ہے۔ اس ضمن میں سی سی ڈی کی شاندار کارکردگی سب کیسامنے ہے۔

(جاری ہے)

سوشل میڈیا پر سی سی ڈی کی کارروائیاں نمایاں موضوع بنی ہوئی ہیں۔ چند دنوں میں 1509 اشتہاریوں کو گرفتار کیا گیا اور 600 مغوی بچوں کو بازیاب کروایا گیا۔

لاہور میں جرائم کی شرح میں 68 فیصد تک کمی آئی ہے جبکہ چکوال، بھلوال اور گجرات جیسے اضلاع میں زیرو ڈکیتی کی وارداتیں رپورٹ ہوئیں۔انہوں نے کہا کہ سی سی ڈی امریکی ایف بی آئی کے طرز پر بنائی گئی ایک صوبائی ایجنسی ہے، جو بڑی وارداتوں اور پیچیدہ مقدمات کی تفتیش کے لیے مثر حکمت عملی کے ساتھ کام کر رہی ہے۔ان خیالات کا اظہار انہوں نے ڈی جی پی آر میں پریس کانفرنس کرتے ہوئے کیا۔

عظمی بخاری نے کہا کہ وزیراعلی پنجاب نے واضح ہدایت کی ہے کہ صوبے کی کسی سڑک پر کوئی جرائم پیشہ رکاوٹ نہیں بن سکتا۔ پنجاب کی تمام سڑکیں کلیئر کروا دی گئی ہیں، اور جرائم پیشہ عناصر اب خود قرآن پاک پر حلف دے کر معافیاں مانگنے پر مجبور ہو چکے ہیں۔ "جو کل تک کن ٹوٹے اور غنڈے بنے پھرتے تھے، وہ آج ویڈیوز میں معافی مانگتے دکھائی دے رہے ہیں۔

آڈٹ رپورٹس کے حوالے سے انہوں نے کہا کہ ایک خاص رپورٹ کا پروپیگنڈا کیا جا رہا ہے، جس میں شامل 12 مشکوک پیراگراف 2021 تا 2023 کے ادوار سے متعلق ہیں۔ ان میں سرکاری رقوم کمرشل بینکوں میں رکھنے، اور گندم کے عوض اربوں کے قرضوں کا ذکر ہے، جو بزدار، پرویز الہی اور دیگر افراد کے ادوار سے متعلق ہیں۔ یہ تمام معاملات مریم نواز کی قیادت میں شفاف انداز سے کلیئر کیے جا چکے ہیں۔

انہوں نے مزید کہا کہ پنجاب کے تمام سرکاری اسکولوں میں ٹرانسپورٹ فراہم کرنے کا فیصلہ کیا گیا ہے۔ 60 ہزار نئی نوکریاں اسکول ایجوکیشن ڈیپارٹمنٹ میں پیدا ہوئی ہیں، جبکہ آٹ سورس کیے گئے اسکولوں میں 90 فیصد سے زائد حاضری ریکارڈ کی گئی ہے۔ اساتذہ کی تعداد میں 114 فیصد اضافہ ہوا ہے۔اپنی چھت، اپنا گھر پروگرام کے تحت 50 ہزار گھروں کے لیے قرضے جاری کیے جا چکے ہیں، جسے خیبرپختونخوا کی حکومت نے اپنایا ہے۔

احساس گھر پروگرام کے لیے پنجاب حکومت نے 50 ارب جبکہ خیبرپختونخوا نے محض 4 ارب روپے مختص کیے ہیں۔ سندھ میں کسان کارڈ کے بعد ہاری کارڈ کا اجرا خوش آئند ہے۔عظمی بخاری نے کہا کہ سیلاب اور بارشوں کے دوران ضلعی اور صوبائی انتظامیہ مسلسل متحرک ہے۔ لاہور میں درجنوں واٹر ٹینکس نصب کر دیے گئے ہیں اور نکاسی آب کا کام جاری ہے۔سوالات کے جواب میں انہوں نے کہا کہ جمائما نے اپنے بیٹوں کو پاکستان آنے سے روکا ہے، لیکن ایک بیٹی کو والد سے ملاقات کا پورا حق حاصل ہے۔

شرپسند عناصر کو بیٹوں کے ذریعے فساد کی اجازت نہیں دی جائے گی۔کچے کے ڈاکوئوں کو خبردار کرتے ہوئے انہوں نے کہا کہ اب پنجاب پولیس کے پاس جدید اسلحہ اور حکمت عملی موجود ہے، وہ اپنی خیر منائیں۔انہوں نے کہا کہ کچھ یوٹیوبرز، جو وی لاگز میں ملکی اداروں کے خلاف بات کرتے ہیں، پاکستان کی خدمت نہیں بلکہ تخریب کارانہ ذہنیت کو فروغ دے رہے ہیں۔وزیر اطلاعات نے زور دے کر کہا کہ پنجاب حکومت کا ہر قدم شفافیت، قانون کی بالادستی، اور عوامی خدمت کے لیے ہے۔ سدھرا پنجاب میں نہ کسی بدمعاش کی گنجائش ہے، نہ کسی جعلی دانشور کے پروپیگنڈے کی۔