Live Updates

تحریک انصاف ملک میں عدم استحکام چاہتی ہے، پی ٹی آئی سیاسی مذاکرات نہیں کرنا چاہتی تو ان سے کیا بات کریں؟، رانا ثناء اللہ

پی ٹی آئی مذاکرات کی خواہاں ہے تو رویہ بھی تبدیل کرے انہوں نے حکومت کے ساتھ بات کرنے کی بات نہیں کی وہ سٹیبلشمنٹ سے بات کرنا چاہتے ہیں، تحریک انصاف کو احتجاج اور دھمکیوں کا رویہ ترک کرنا ہوگا،وزیراعظم کے مشیربرائے سیاسی امور کی گفتگو

فیصل علوی پیر 14 جولائی 2025 11:08

تحریک انصاف ملک میں عدم استحکام چاہتی ہے، پی ٹی آئی سیاسی مذاکرات نہیں ..

اسلام آباد(اردوپوائنٹ اخبار تازہ ترین۔14جولائی 2025)وزیراعظم کے مشیر برائے سیاسی امور کا کہنا ہے کہ تحریک انصاف ملک میں عدم استحکام چاہتی ہے، پی ٹی آئی سیاسی مذاکرات نہیں کرنا چاہتی تو ان سے کیا بات کریں؟، پی ٹی آئی مذاکرات کی خواہاں ہے تو رویہ بھی تبدیل کرے، جیو نیوز کے پروگرام میں گفتگو کرتے ہوئے وزیراعظم کے مشیر برائے سیاسی امور نے کہا کہ پی ٹی آئی نے حکومت کے ساتھ بات کرنے کی بات نہیں کی وہ سٹیبلشمنٹ سے بات کرنا چاہتے ہیں۔

پی ٹی آئی سیاسی مذاکرات نہیں کرنا چاہتی تو ان سے کیا بات کریں؟ ہماری خواہش ہے ملک کی معیشت بحال ہو اور پاکستان ایک ترقی یافتہ ملک کے طور پر ابھرے اس پر افہام تفہیم کیلئے بیٹھنے کو تیار ہیں۔ بانی پی ٹی آئی تو کہتے ہیں ان کی رہائی عدالتوں سے ہو۔

(جاری ہے)

پی ٹی آئی پر امن رہی تو ٹھیک ہے۔ بصورت دیگر قانون ہاتھ میں لیا اور عدم استحکام پیدا کرنے کی کوشش جو شروع سے ان کی کوشش رہی یہ لوگ آئی ایم ایف کے دفاتر کے باہر جلوس نکالتے تھے اور خطوط لکھے کہ پاکستان کو قسط نہ دی جائے وہ چاہتے ہیں ملک معاشی بدحالی کا شکار ہو اگر ایسا کچھ ہوا تو یقیناً قانون اپنا راستہ لے گا۔

انہوں نے کہا کہ پاکستان تحریک انصاف کو احتجاج اور دھمکیوں کا رویہ ترک کرنا ہوگا۔پرامن احتجاج ہر سیاسی جماعت کا جمہوری حق ہے۔ پی ٹی آئی کا احتجاج پرامن نہ ہواتوقانون اپنا راستہ اپنائے گا۔ایک سوال کے جواب میں راناثناء اللہ کا کہنا تھا کہ بانی پی ٹی آئی کہتے ہیں مذاکرات میں ان کی رہائی کی بات نہ کی جائے۔علی امین گنڈاپور کی گفتگو سے اندازہ ہوتا ہے کہ پی ٹی آئی ملک میں عدم استحکام چاہتی ہے اس کے علاوہ ان کا کوئی اور ایجنڈا معلوم نہیں ہوتا، ان کے جو باقی مطالبات ہیں ان پر بات کرنے کو تیار ہیں۔

پی ٹی آئی نے حکومت کے ساتھ بات کرنے کی بات نہیں کی وہ اسٹیبلشمنٹ سے بات کرنا چاہتے ہیں اسی سے اپنے معاملات سیدھا کرنے کی کوشش میں لگے ہوئے ہیں وہ نہ سیاسی جماعتوں اور نہ ہی سیاستدانوں کے ساتھ بیٹھنے کو تیار ہیں وہ اسی ایجنڈے پر قائم ہیں کہ اس طرح ان کی مدد کی جائے جیسے 2018 میں آر ٹی ایس بٹھایا کرانہیں لایا گیا، وہ سیاسی ڈائیلاگ کی خواہش نہیں رکھتے۔

عمران خان کے مقدمات عدالت میں ہیں، انہوں نے ان کے خلاف اپیل کی ہوئی ہے، پی ٹی آئی کا مؤقف ہے کہ عمران کی رہائی کی بات نہیں کریں گے، عمران خان نے کہا ہیکہ میں رہا عدالتوں سے ہوں گا اور میں میرٹ پر رہائی چاہتا ہوں لہٰذا حکومت کے ساتھ مذارکات میں رہائی کی بات نہ کی جائے۔ان کا یہ بھی کہنا تھا کہ سربراہ جے یو آئی مولانا فضل الرحمان سے ملاقات ہوئی۔ ان سے خیبر پختونخوا ہ اسمبلی میں سینیٹ الیکشن سے متعلق گفتگو ہوئی۔