ّپنجاب کے پسماندہ علاقوں میں بھی اعلیٰ تعلیم کی سہولتیں دستیاب ہونی چاہئیں: گورنر پنجاب

بلاول بھٹو نوجوانوں کی امید ہیں اور وہ انہیں وزیراعظم دیکھنا چاہتے ہیں، سردار سلیم حیدر خان سے طلباء وفد سے گفتگو

پیر 14 جولائی 2025 22:00

لاہور (اُردو پوائنٹ اخبارتازہ ترین - آن لائن۔ 14 جولائی2025ء) گورنر پنجاب سردار سلیم حیدر خان نے کہا ہے کہ نوجوان نسل ملک کا مستقبل ہیں اور انہیں تعلیمی سہولیات فراہم کرنا حکومت کی ذمہ داری ہے۔ پنجاب کے پسماندہ علاقوں میں بھی اعلیٰ تعلیم کی سہولتیں دستیاب ہونی چاہئیں۔ یہ بات انہوں نے گورنر ہاؤس لاہور میں پی ایس ایف کے سیکرٹری اطلاعات سبط حسن کی قیادت میں طلباء کے وفد سے ملاقات کے دوران کہی۔

اس موقع پر ممبر پنجاب ایگزیکٹو احسن رضوی بھی موجود تھے۔

(جاری ہے)

گورنر پنجاب نے کہا کہ چیئرمین پاکستان پیپلز پارٹی بلاول بھٹو ملک کے نوجوانوں کی امید ہیں اور وہ انہیں وزیراعظم دیکھنا چاہتے ہیں۔ انہوں نے طلباء کو یوم آزادی کی بھرپور تیاریاں کرنے کی ہدایات بھی جاری کیں۔ اس موقع پر طلباء کے وفد نے گورنر پنجاب کو ضلع شیخوپورہ میں یونیورسٹی کے قیام سمیت مختلف مسائل سے آگاہ کیا۔

طلباء کا کہنا تھا کہ گورنر پنجاب نے حقیقی معنوں میں گورنر ہاؤس کو عوام کے لیے کھول دیا ہے۔ طلباء نے تعلیمی اداروں کو آؤٹ سورس کرنے اور بلھے شاہ یونیورسٹی کو ضلع قصور سے باہر منتقل کرنے پر بھی اپنے تحفظات کا اظہار کیا۔ گورنر پنجاب نے طلباء کو درپیش مسائل کے حل کے لیے ہر ممکن تعاون کی یقین دہانی کرائی