نوجوانوں کو عالمی سطح پر مقابلہ کیلئے اپنی مہارت اور ٹیکنالوجی میں مزید بہتری لانا ہو گی ، وفاقی وزیر خالد مقبول صدیقی

اسلام آباد (اُردو پوائنٹ اخبارتازہ ترین - اے پی پی۔ 15 جولائی2025ء) وفاقی وزیر تعلیم و پیشہ وارانہ تربیت ڈاکٹر خالد مقبول صدیقی نے نوجوانوں پر زور دیا ہے کہ ہمیں اپنی مہارت اور ٹیکنالوجی میں مزید بہتری لانا ہو گی تاکہ عالمی سطح پر مقابلہ کر سکیں، دین کا اصل مقصد علم اور سچائی کی تلاش ہے، تمہارا مقابلہ آپس میں نہیں بلکہ دنیا کے دیگر ممالک سے ہے۔

وہ منگل کو نیوٹیک کے زیر اہتمام عالمی یوم مہارت نوجوانان کے حوالہ سے منعقدہ ہنرمندی کے مقابلوں کی تقریب سے خطاب کر رہے تھے۔ نیشنل ووکیشنل اینڈ ٹیکنیکل ٹریننگ کمیشن (نیوٹیک)نے یومِ عالمی مہارت نوجوانان کے موقع پر سنٹر آف ایکسیلینس میں نیشنل سکلز مقابلے کا انعقاد کیا جس میں پاکستانی نوجوانوں نے غیر معمولی صلاحیتوں اور فنی مہارت کا شاندار مظاہرہ کیا۔

(جاری ہے)

ملک بھر سے ان مقابلوں میں ہنرمند نوجوانوں نے شرکت کی اور ہاسپیٹیلٹی، مکینیکل، ٹیکسٹائل، کنسٹرکشن، سروسز اور انفارمیشن ٹیکنالوجی سمیت مختلف شعبہ جات میں اپنی مہارتوں کا مظاہرہ کیا۔اس موقع پر مہمانِ خصوصی وفاقی وزیر برائے تعلیم و پیشہ وارانہ تربیت ڈاکٹر خالد مقبول صدیقی ، چیئرمین پنجاب ٹیوٹا ساجد کھوکھر ، پارلیمانی سیکرٹری فرح ناز اور چیئرمین وزیراعظم یوتھ پروگرام رانا مشہود احمد خان نے شرکت کی۔

وفاقی وزیر تعلیم ڈاکٹر خالد مقبول صدیقی نے نیوٹیک کے ایگزیکٹو ڈائریکٹر کی قیادت کو تمام سٹیک ہولڈرز کو ایک چھت تلے جمع کرنے کی کوشش کو سراہا۔ انہوں نے کہا کہ پاکستان عزم اور جذبے کا نام ہے، دین کا اصل مقصد علم اور سچائی کی تلاش ہے۔ انہوں نے نوجوانوں پر زور دیا کہ تمہارا مقابلہ آپس میں نہیں بلکہ دنیا کے دیگر ممالک سے ہے۔انہوں نے کہا کہ ہمیں اپنی مہارت اور ٹیکنالوجی میں مزید بہتری لانا ہو گی تاکہ عالمی سطح پر مقابلہ کر سکیں۔

رانا مشہود احمد خان نے کہا کہ میں وفاقی وزیر کا شکر گزار ہوں اور نیوٹیک اور اس کے اداروں کی انتھک محنت کو سراہتا ہوں، آج دنیا بھر سے پاکستان کے بارے میں مثبت خبریں آ رہی ہیں، ہمارا عالمی امیج بہتر ہو رہا ہے اور کئی ممالک ہمارے ساتھ تعاون کے خواہاں ہیں۔ انہوں نے کہا کہ ہم نے ٹیکنالوجی کے میدان میں اپنی صلاحیتیں پہلے ہی ثابت کر دی ہیں، اب وقت ہے کہ ہم معیشت میں بھی اپنی برتری ثابت کریں،وزیراعظم کی جانب سے ہنر پر مبنی تعلیم کے فروغ کے لئے بھرپور توجہ دی جا رہی ہے۔

چیئرمین پنجاب ٹیوٹا ساجد کھوکھر نے کہا کہ ورلڈ یوتھ سکلز ڈے صرف ایک دن منانا کافی نہیں ہمیں پورا سال ہنر کی ترقی کے لئے وقف کرنا چاہئے، نیوٹیک کا نیشنل سکلز مقابلہ منعقد کرنا ایک بہترین قدم ہے جس سے سکلز کے نظام میں ہم آہنگی اور تعاون کو فروغ ملا ہے۔پارلیمانی سیکرٹری فرح ناز نے وفاقی وزیر اور نیوٹیک کے ایگزیکٹو ڈائریکٹر کی یومِ عالمی مہارت نوجوانان پر نیشنل سکلز مقابلے منعقد کرنے کو سراہا۔

انہوں نے کہا کہ یہ دن نوجوانوں کے لئے ہنر کو طاقت بنانے کی علامت ہے اور قومی ترقی کا اہم ستون ہے۔نیوٹیک کے ایگزیکٹو ڈائریکٹر محمد عامر جان نے کہا کہ میں وفاقی وزیر کا شکر گزار ہوں جن کی سرپرستی میں نیوٹیک نے اپنی صلاحیت کا عملی مظاہرہ کیا ہے، پہلی مرتبہ ہم نے یومِ مہارت نوجوانان کو ایک مکمل اور بھرپور انداز میں منایا ہے، نوجوانوں کے زبردست ردِ عمل سے حوصلہ پا کر اب ہم اسے ہر سال منانے کا عزم رکھتے ہیں۔

انہوں نے مزید کہا کہ نیوٹیک نے آؤٹ پٹ بیسڈ کورسز سے انڈسٹری لیڈ ٹریننگ کی جانب پیشرفت کی ہے، صنعتوں کے ساتھ قریبی اشتراک سے اب نوجوانوں کو براہِ راست، عملی تربیت فراہم کی جا رہی ہے تاکہ ان کی مہارتیں مارکیٹ کی حقیقی ضروریات سے ہم آہنگ ہو سکیں۔اس موقع پر نیوٹیک نے اپنا آفیشل تھیم سانگ بھی لانچ کیا جو نوجوانوں کو ہنر سیکھنے اور تکنیکی تربیت میں بھرپور حصہ لینے کے لئے پرجوش اور متحرک کرنے کے لئے ترتیب دیا گیا ہے۔

تقریب میں معزز مہمان، انڈسٹری ایکسپرٹس، ترقیاتی شراکت دار اور ٹریننگ پرووائیڈرز نے شرکت کی اور نوجوان شرکاء کی حوصلہ افزائی کی۔ اس دن میں لائیو سکل ڈیموسٹریشنز اور کامیاب نیوٹیک گریجویٹس کی پریزنٹیشنز شامل تھیں جنہوں نے سکل مقابلوں کے تسلسل کی ضرورت پر زور دیا تاکہ قومی سطح پر ٹیلنٹ کو اجاگر اور سراہا جا سکے۔ملک بھر سے 5,000 درخواست دہندگان میں سے صرف 133 امیدوار نیشنل سکلز مقابلے کے لئے منتخب ہوئے۔ ہر کیٹیگری میں دو انعامات دیئے گئے جن میں پہلا انعام ایک لاکھ روپے اور دوسرا انعام 50 ہزار روپے تھا۔ یہ انعامات ان نوجوانوں کی مہارت اور صلاحیت کا اعتراف تھے جو اس مقابلے کا حصہ بنے۔