گورنر سندھ کا صابری خاندان سے اظہار تعزیت، سانحہ قلات کو بھارتی سازش قرار دیدیا

جمعرات 17 جولائی 2025 15:53

کراچی(اُردو پوائنٹ اخبارتازہ ترین - این این آئی۔ 17 جولائی2025ء)گورنر سندھ کامران ٹیسوری سانحہ قلات میں جاں بحق ہونے والے قوال احمد علی صابری اور دیگر شہدا کے اہلِ خانہ سے تعزیت کے لیے رات گئے پی آئی بی کالونی میں ان کے گھر پہنچے۔ان کے ہمراہ ایم کیوایم کے سینئررہنما ڈاکٹرفاروق ستار بھی تھے، اس موقع پر گورنر سندھ نے واقعے کو بزدلانہ دہشتگردی قرار دیتے ہوئے اسے بھارت کی پشت پناہی یافتہ سازش قرار دیا۔

انہوں نے کہا کہ ہمارے معصوم شہریوں کو نشانہ بنایا گیا ہم اس کا بدلہ لیں گے، ہم نے بھارت کو دھول چٹائی ہے اور ایک بار پھر دھول چٹائیں گے۔ میڈیا سے گفتگو میں گورنرسندھ نے کہا کہ یہ وہی صابری خاندان ہے جو دوسروں کی خوشیوں میں شریک ہوتا ہے، لیکن آج وہ خود غم کی تصویر بنا ہوا ہے۔

(جاری ہے)

احمد صابری، ان کے بیٹے اور ٹیم کے دیگر افراد کو دہشتگردی کا نشانہ بنایا گیا جو ناقابلِ برداشت سانحہ ہے۔

رضا شہید کی 6 مہینے کی بیٹی ہے، احمد شہید کی 4 بیٹیاں ہیں۔ قوال برادری کراچی کی روحانی، ثقافتی اور سماجی پہچان ہے، اور ان پر حملہ پورے پاکستان کے جذبات پر حملے کے مترادف ہے۔انہوں نے کہاکہ یہ خاندان خوشیاں بانٹتا ہے اور آج انہیں کو نشانہ بنایا گیا۔ یہ محض دہشتگردی نہیں ایک منصوبہ بند سازش ہے جو بلوچ اور پنجابی قوموں کے درمیان نفرت پھیلانے کی کوشش ہے۔

کامران ٹیسوری نے واضح کیا کہ پاکستان کے ریاستی ادارے اور عوام خاموش نہیں رہیں گے اور ہم اس کا بدلہ لیں گے۔اگر دہشتگرد باز نہ آئے تو ان کی پناہ گاہوں میں گھس کر ماریں گے، ہم خاموش ضرور ہیں، کمزور نہیں، اب وقت آ گیا ہے کہ قتل کا بدلہ قتل ہو۔گورنر سندھ نے سانحہ قلات کو بھارت سے جوڑتے ہوئے کہا کہ یہ فتنہ الہند کی کارستانی ہے۔ مودی اپنی شکست کا بدلہ پاکستانی عوام، خاص طور پر کراچی کے عوام سے لے رہا ہے۔ ہم 14 اگست بھرپور طریقے سے منائیں گے اور دنیا کو بتائیں گے کہ پاکستان متحد ہے۔کامران ٹیسوری نے وزیر داخلہ محسن نقوی اور وزیر اعلی سرفراز بگٹی سے فوری ایکشن لینے اور زخمیوں کو کراچی منتقل کرنے کا مطالبہ کیا۔