بلاول بھٹو زرداری کاشہید شاہنواز بھٹو کو ان کی برسی کے موقع پر شاندار الفاظ میں خراجِ عقیدت پیش

پاکستانی نوجوان شہید شاہنواز بھٹو جیسے رہنمائوں کی قربانیوں کو یاد رکھیں اور ظلم و ناانصافی کے خلاف ثابت قدم رہیں،چیئرمین پیپلزپارٹی

جمعہ 18 جولائی 2025 12:57

بلاول بھٹو زرداری کاشہید شاہنواز بھٹو کو ان کی برسی کے موقع پر شاندار ..

کراچی(اُردو پوائنٹ اخبارتازہ ترین - این این آئی۔ 18 جولائی2025ء)پاکستان پیپلز پارٹی کے چیئرمین بلاول بھٹو زرداری نے شہید شاہنواز بھٹو کو ان کی برسی کے موقع پر شاندار الفاظ میں خراجِ عقیدت پیش کرتے ہوئے انہیں جرات اور جمہوریت کے لیے غیرمتزلزل ثابتقدمی کی علامت قرار دیا ہے۔ میڈیا سیل بلاول ہائوس سے جاری کردہ پریس ریلیز کے مطابق، پی پی پی چیئرمین نے اپنے پیغام میں کہاکہ شہید شاہنواز بھٹو کو جلاوطنی کے دوران شہید کردیا گیا تھا، لیکن اپنی مختصر زندگی میں انہوں نے پاکستان سمیت دنیا بھر کے نوجوانوں کو جدوجہد اور قربانی کا درس دیا۔

انہوں نے کہا کہ وہ ایک انقلابی والد قائدِ عوام شہید ذوالفقار علی بھٹو کے بہادر بیٹے تھے اور انہوں نے اپنے والد کے مشن کو دلیری اور استقامت کے ساتھ آگے بڑھایا۔

(جاری ہے)

انہوں نے مزید کہا کہ شہید شاہنواز بھٹو کی وقت سے پہلے شہادت صرف ہمارے خاندان کا ذاتی نقصان نہیں تھی بلکہ یہ ہمارے ملک کی جمہوری جدوجہد کے دل پر ایک گہرا زخم تھا۔ چیئرمین بلاول بھٹو زرداری نے کہا کہ بھٹو خاندان نے پاکستان کے عوام اور ایک منصفانہ، جمہوری اور برابری پر مبنی معاشرے کے خواب کی تکمیل کے لیے قربانیاں دیں۔

ہمارے شہیدوں کا لہو اس ملک میں جمہوریت کی جڑوں کو سیراب کرتا رہا ہے۔ ہم ان کی قربانیوں سے طاقت حاصل کرتے ہیں اور ان کے مشن کو جاری رکھنے کے عہد کی تجدید کرتے ہیں۔ چیئرمین بلاول بھٹو زرداری نے پاکستانی نوجوانوں پر زور دیا کہ وہ شہید شاہنواز بھٹو جیسے رہنماں کی قربانیوں کو یاد رکھیں اور ظلم و ناانصافی کے خلاف ثابت قدم رہیں۔