ایف بی آر کو اضافی اختیارات دینے کامعاملہ، تاجربرادری تقسیم ، کراچی، لاہور میں تاجروں کی ہڑتال، فیڈریشن آف پاکستان چیمبرز کا ہڑتال نہ کرنے کا اعلان

لاہور،کراچی،اسلام آباد(اردوپوائنٹ اخبار تازہ ترین۔19جولائی 2025)ایف بی آر کو اضافی اختیارات دینے کیخلاف تاجر برادری تقسیم، کراچی اور لاہور میں تاجروں کی ہڑتال، اہم کاروباری مراکزاور ملحقہ مارکیٹیں بند، فیڈریشن آف پاکستان چیمبرز کا ملک گیر ہڑتال نہ کرنے کا اعلان کر دیا، صدر ایف پی سی سی آئی عاطف اکرام شیخ نے خصوصی کمیٹی کے اجلاس کے بعد پریس کانفرنس کرتے ہوئے کہا کہ تاجر برادری نے حکومت سے کامیاب مذاکرات کے بعد ہڑتال نہ کرنے پر اتفاق کر لیا ہے۔

ان کے مطابق حکومت نے متنازع ٹیکس شقیں واپس لینے کا عندیہ دیا ہے اور اب سفارشات کی حتمی منظوری وزیراعظم دیں گے۔دوسری جانب تاجر برادری کا کہنا ہے کہ ایف بی آر کے تھرٹی سیون اے اے قانون اور بینک ٹرانزیکشن پر سولہ فیصد ٹیکس نفاز کے خلاف ہڑتال کی جائیگی۔

(جاری ہے)

کراچی چیمبر آف کامرس نے ایف پی سی سی آئی کے مؤقف سے اختلاف کرتے ہوئے آج شہر بھر میں کاروبار بند رکھنے کا اعلان کیا ہواہے۔

کراچی کے اہم کاروباری مراکز بشمول جوڑیا بازار، فروٹ اینڈ سبزی منڈی، صرافہ بازار، لائٹ ہاؤس اور الیکٹرانک مارکیٹ کے علاقوں میں ہڑتال کی جا رہی ہے۔صدر کراچی چیمبر جاوید بلوانی کاکہنا ہے کہ ہماری ہڑتال پرامن ہوگی، تاہم جب فیڈریشن ہاؤس بڑے بننے کا دعویٰ کر رہا ہے تو اسے مطالبات پورے ہونے کی ذمے داری بھی لینی چاہیے۔ انہوں نے کہا کہ ہم نے تحریری ضمانت مانگی تھی، جو نہ ملنے پر آج ہڑتال کا فیصلہ کیا ہے۔

صوبائی دارالحکومت لاہور میں بھی صدر لاہور چیمبر میاں ابو ذر شاد نے بھی آج ہڑتال کا اعلان کیا ہے۔ ان کا کہنا ہے کہ آج تاجروں کے احتجاج میں شرکت کریں گے۔  انجمن تاجران اور کاروباری تنظیموں کی کال پر شہر کے مختلف کاروباری مراکز بند رہیں گے۔ مرکزی غلہ منڈی، اکبری منڈی، بادامی باغ آٹو پارٹس مارکیٹ، لوہا مارکیٹ، شاہ عالم مارکیٹ، لوہاری مارکیٹ، برانڈرتھ روڈ اور ملحقہ مارکیٹیں بند رہیں گی۔

انہوں نے کہا کہ حکومت سے اب وعدے نہیں عملدرآمد چاہیے۔پاکستان سٹیل ٹریڈرز ایسوسی ایشن اور پیپر مارکیٹ گنپت روڈ کی جانب سے بھی مکمل ہڑتال کی اپیل کی گئی۔ مال روڈ پر ٹیکسٹائل ٹریڈرز ایسوسی ایشن کی کال پر کاروباری سرگرمیاں معطل رہیں گی۔پیپر مارکیٹ، مصری شاہ، لوہا مارکیٹ، داروغہ والا، ہال روڈ، مال روڈ، بیڈن روڈ اور نیلا گمبند کی مارکیٹیں بھی بند رہیں، جہاں معمول کی تجارتی سرگرمیاں بالکل مفقود رہیں۔

اس کے علاوہ فیروز پورہ روڈ اور عابد مارکیٹ میں بھی دکانیں کھل نہ سکیں جس سے شہر بھر میں کاروباری جمود کی فضا چھائی رہی۔تاجروں کی نمائندگی کرتے ہوئے مجاہد مقصود بٹ نے میڈیا سے گفتگو کرتے ہوئے کہا کہ اگر تاجر برادری کو ہراساں کیا گیا تو ہڑتال کا سلسلہ جاری رہے گا۔ ان کا کہنا تھا کہ لاہور کی تاجر برادری نے مکمل اتحاد اور یکجہتی کے ساتھ ہڑتال کو کامیاب بنایا ہے، جس سے ان کے مطالبات کی سنگینی واضح ہو گئی ہے۔

تاجر تنظیموں کا حکومت سے مطالبہ ہے کہ ایف بی آر کے اختیارات میں کمی کی جائے اور کاروباری طبقے کو ہراساں کرنے کا سلسلہ بند کیا جائے، اگر حکومت نے تحریری طور پر یقین دہانی نہ کروائی تو احتجاج کا دائرہ مزید بڑھایا جائے گا۔قبل ازیں پریس کانفرنس کرتے ہوئے فیڈریشن پاکستان آف چیمبر زعاطف اکرم شیخ کا یہ بھی کہناتھا کہ کچھ تاجر رہنما ناراض ضرور تھے لیکن چار گھنٹے طویل میٹنگ کے بعد وہ بھی متفق ہو گئے۔

انہوں نے بتایا کہ ایف بی آر اور تاجروں کے نمائندوں پر مشتمل چار رکنی کمیٹی تشکیل دے دی گئی ہے جو تمام مسائل کو حل کرنے پر کام کرے گی۔تاجر رہنما اجمل بلوچ کا کہنا تھا کہ تمام چیمبرز اور تاجر برادری آج ایک پیج پر ہیں اور ہمیں ایک ماہ کے اندر مسائل کے حل کی یقین دہانی کروائی گئی ہے۔ تاہم انہوں نے خبردار کیا کہ اگر وعدے پورے نہ ہوئے تو احتجاج سے گریز نہیں کریں گے۔عاطف اکرام نے زور دیا کہ ہڑتالیں مسائل کا حل نہیں، جبکہ بات چیت کے ذریعے بہتر نتائج حاصل کئے جا سکتے ہیں۔ ان کا کہنا تھا کہ ملک بھر کے چیمبرز ہمارے ساتھ ہیں اور حکومت کے ساتھ مذاکرات خوشگوار ماحول میں ہوئے ہیں۔