Live Updates

جو کورم پورا کرنے کے قابل نہیں انہیں پی ٹی آئی کی مخصوص نشستیں دے دی گئیں، عمر ایوب

جب سپریم کورٹ نے مخصوص نشستیں پی ٹی آئی کو دینے کا حکم دیا تھا اُس وقت الیکشن کمیشن کہاں تھا؟ تب کیا 'سلیپ موڈ' پر تھا یا 'ہائبرڈ وائرس' نے 'اسٹریٹجک مفلوجی' میں مبتلا کر دیا تھا؟ اپوزیشن لیڈر کا ردعمل

ساجد علی اتوار 20 جولائی 2025 17:33

جو کورم پورا کرنے کے قابل نہیں انہیں پی ٹی آئی کی مخصوص نشستیں دے دی ..

اسلام آباد ( اُردو پوائنٹ اخبارتازہ ترین۔ 20 جولائی 2025ء ) قومی اسمبلی میں اپوزیشن لیڈر عمر ایوب خان کا کہنا ہے کہ جو کورم پورا کرنے کے قابل بھی نہیں انہیں پی ٹی آئی کی مخصوص نشستیں دے دی گئیں۔ اپنے ایک بیان میں انہوں نے کہا کہ یہ سب صرف کسی مکمل بنانا ریپبلک یا پاکستان کے "ہائبرڈ نظام" میں ہی ہو سکتا ہے کہ جہاں خیبرپختونخواہ میں وہ سیاسی جماعتیں جو اسمبلی میں کورم پورا کرنے کے قابل بھی نہیں ہیں انہیں پی ٹی آئی کی مخصوص نشستیں دے دی گئیں، ماشاءاللہ۔

عمر ایوب کا کہنا ہے کہ الیکشن کمیشن اتوار کے دن اپنے دروازے کھولتا ہے اور پشاور ہائیکورٹ کو خط لکھ کر گورنر کو یہ اختیار دیتا ہے کہ وہ ان "خیراتی ایم پی ایز" سے حلف لے اور پھر فوراً یہ عمل مکمل بھی ہو جاتا ہے سبحان اللہ، حالاں کہ جب سپریم کورٹ نے پہلے ہی مخصوص نشستیں پی ٹی آئی کو دینے کا حکم دیا تھا تو اُس وقت الیکشن کمیشن کہاں تھا؟ کیا اُس وقت الیکشن کمیشن "سلیپ موڈ" پر تھا یا "ہائبرڈ وائرس" نے اُسے "اسٹریٹجک مفلوجی" میں مبتلا کر دیا تھا؟۔

(جاری ہے)

قومی اسمبلی میں اپوزیشن لیڈر نے یہ بھی کہا ہے کہ سینیٹ کی حتمی فہرست عمران خان نے جاری کی ہے، بانی کا ہر فیصلہ اٹل اور حتمی سمجھا جاتا ہے، امیدواروں کی فہرست تحریک انصاف کے بانی عمران خان کی جانب سے فراہم کی گئی ہے اور اس میں کسی رائے یا مشاورت کی گنجائش موجود نہیں بلکہ پارٹی بانی کا ہر فیصلہ اٹل اور حتمی سمجھا جاتا ہے۔ ان کا کہنا تھا کہ احتجاجی تحریک میں تیزی آ رہی ہے اور اب صرف خیبرپختونخواہ ہی نہیں بلکہ دیگر صوبوں سے بھی عوام کی شرکت میں نمایاں اضافہ دیکھنے کو مل رہا ہے، بانی عمران خان کی جانب سے اپنے قانونی مشیروں اور بہنوں کے ذریعے یہ پیغام دیا گیا ہے کہ ان کی بھیجی گئی امیدواروں کی فہرست ہی حتمی تصور کی جائے۔