پولنگ اسٹیشن میں موبائل ، الیکٹرانک ڈیوائس لیجانا منع ،بیلٹ پیپر کی تصاویر لینا بھی ممنوعہ ہوگا‘ سینیٹ ضمنی انتخاب کیلئے ضابطہ اخلاق

امیدوار یا حامی کسی سرکاری ملازم یا عہدیدار سے مدد نہیں مانگ سکتے،ضابطہ اخلاق کی خلا ف ورزی پرتوہین عدالت کا نوٹس لیا جا سکتا ہے

اتوار 20 جولائی 2025 17:45

لاہور(اُردو پوائنٹ اخبارتازہ ترین - این این آئی۔ 20 جولائی2025ء)پنجاب اسمبلی میں آج ( پیر) کے روزہونے والے سینیٹ کے ضمنی انتخاب کے لئے ضابطہ اخلاق جاری کر دیا گیا ۔ اسمبلی سیکرٹریٹ کو ضابطہ اخلاق الیکشن کمیشن کی جانب سے بھجوایا گیا۔

(جاری ہے)

سیاسی جماعتوں، امیدواروں، الیکشن ایجنٹس اور ووٹرز کے لیے جاری کئے گئے ضابطہ اخلاق میں کہا گیا ہے کہ پولنگ اسٹیشن میں موبائل فون یا الیکٹرانک ڈیوائس لے جانا سختی سے منع ہے ،بیلٹ پیپر کی تصاویر لینا بھی ممنوعہ ہوگا،امیدوار یا ان کے حامی کسی سرکاری ملازم یا عہدیدار سے مدد نہیں مانگ سکتے،کوئی سرکاری ملازم یا عہدیدار کسی امیدوار کی حمایت یا مخالفت نہیں کر سکتا، صدر مملکت اور صوبائی گورنرز سینیٹ انتخابات کی مہم میں کسی بھی طرح حصہ نہیں لیں گے اور نا ہی سرکاری املاک کا استعمال کریں گے ، اسلام کی عظمت، پاکستان کے نظریے، پارلیمنٹ،عدلیہ ، افواج کی سالمیت و آزادی کے خلاف کوئی رائے یا عمل نہیں کرے گا، ان اداروں کی توہین یا مذاق اڑانا بھی ممنوعہ ۔

ضابطہ اخلاق کی خلاف ورزی پر الیکشن ایکٹ 2017 کی سیکشن 10 کے تحت توہین عدالت کا نوٹس لیا جا سکتا ہے۔