ملاکنڈ میں سکیورٹی فورسز کا چار روزہ آپریشن، 9 خوارج ہلاک، 8 گرفتار

خوارج کے زیر استعمال دو ٹھکانے تباہ، بڑی مقدار میں اسلحہ، گولہ بارود اور دھماکہ خیز مواد برآمد کیا گیا؛ آئی ایس پی آر

ساجد علی اتوار 20 جولائی 2025 18:30

ملاکنڈ میں سکیورٹی فورسز کا چار روزہ آپریشن، 9 خوارج ہلاک، 8 گرفتار

راولپنڈی ( اُردو پوائنٹ اخبارتازہ ترین۔ 20 جولائی 2025ء ) ملاکنڈ میں سکیورٹی فورسز کے چار روزہ آپریشن میں 9 خوارج مارے گئے اور 8 کو گرفتار کرلیا گیا۔ پاک فوج کے شعبہ تعلقات عامہ ( آئی ایس پی آر ) کے مطابق ضلع ملاکنڈ میں 16 سے 20 جولائی تک سکیورٹی فورسز نے پولیس، لیویز، سی ٹی ڈی اور ضلعی انتظامیہ کے ساتھ مل کر خفیہ اطلاعات کی بنیاد پر مشترکہ آپریشن کیا کیوں کہ علاقے میں بھارتی ایجنٹ تنظیم فتنہ الخوارج سے تعلق رکھنے والے خوارج موجود تھے۔

آئی ایس پی آر کی جانب سے بتایا گیا ہے کہ چار روز تک جاری رہنے والے اس آپریشن کے دوران سکیورٹی فورسز نے مہارت سے خوارج کے ٹھکانے کو گھیرے میں لے کر مؤثر طریقے سے نشانہ بنایا اور شدید فائرنگ کے تبادلے کے بعد 9 بھارتی سرپرستی میں سرگرم خوارج ہلاک کر دیئے گئے اور 8 خوارج کو گرفتار کر لیا گیا، خوارج کے زیر استعمال دو ٹھکانے بھی تباہ کر دیے گئے اور بڑی مقدار میں اسلحہ، گولہ بارود اور دھماکہ خیز مواد برآمد کیا گیا۔

(جاری ہے)

پاک فوج کے ترجمان ادارے کا کہنا ہے کہ علاقے کے مقامی لوگوں نے اس آپریشن کو سراہا اور ریاست کی انسداد دہشت گردی کی کوششوں کی مکمل حمایت کا اظہار کیا، علاقے میں مزید خوارج کی موجودگی کے خاتمے کے لیے کلیئرنس آپریشن جاری ہے، کیونکہ پاکستان کی سیکیورٹی فورسز اور قانون نافذ کرنے والے ادارے قوم کے ساتھ مل کر بھارتی سرپرستی میں ہونے والی دہشت گردی کے ناسور کو ملک سے ختم کرنے کے لیے پرعزم ہیں۔

ڈپٹی کمشنر حامدالرحمن نے بتایا کہ آپریشن میں گن شپ ہیلی کاپٹروں نے بھی حصہ لیا، آپریشن کے دوران دہشتگردوں کے قبضے سے بھاری مقدار میں گولہ بارود برآمد ہوا، آپریشن مکمل کرکے علاقے کو کلیئر کردیا گیا، تاہم ضلع بھر میں سیکیورٹی بدستور سخت رہے گی، آپریشن میں پاک فوج، سی ٹی ڈی، ایف سی، الیٹ فورس اور لیویز نے حصہ لیا، آپریشن کے دوران ہلاک و گرفتار فتنہ الخوارج کے دہشت گرد گروہ میں غیر ملکی بھی شامل ہیں۔