بانی پی ٹی آئی کے بیٹوں کو آنے سے حکومت کیوں روکے گی، جب آنا چاہئیں آئیں،خواجہ آصف

اسلام آباد (اُردو پوائنٹ اخبارتازہ ترین - این این آئی۔ 30 جولائی2025ء)وزیر دفاع خواجہ محمد آصف نے کہا ہے کہ بانی پی ٹی آئی کے بیٹوں کو آنے سے حکومت کیوں روکے گی جب آنا چاہئیں آ جائیں۔نجی ٹی وی سے گفتگو کرتے ہوئے خواجہ آصف نے کہا کہ عمران خان کے بیٹے پاکستان آنے کیلئے وزٹ، اجازت اور شرائط پوری کر کے آسکتے ہیں، میں نے میڈیا پر ہی پڑھا ہے کہ والد نے منع کیا کہ وہ نہ آئیں۔

انہوں نے کہا کہ ہمارا موقف صرف یہ ہے کہ پی ٹی آئی تشدد کی طرف رجوع نہ کرے، احتجاج کرنا سیاسی جماعتوں کا حق ہوتا ہے، انہیں اس کی اجازت ہوگی۔انہوں نے کہا کہ اگر پی ٹی آئی چاہتی ہے کہ 9مئی یا 26نومبر پھر برپا کرے تو اجازت نہیں دی جائے گی۔ انہوںنے کہا کہ نریندر مودی کی نا اب ڈوب چکی ہے، بیانات دے کر نریندر مودی اپنی ساکھ دوبارہ بحال کرنا چاہتا ہے، پاک فوج اور قوم نے مودی کی ساکھ مٹی میں ملائی اور وہ رل گیا۔

(جاری ہے)

خواجہ آصف نے کہا کہ نریندر مودی عالمی سطح پر رل گیا، جس سے گلے ملتا ہے وہ گلے نہیں ملتے، کسی کو ہاتھ ملانا چاہتا ہے وہ ہاتھ نہیں ملاتے، نریندر مودی اب بین الاقوامی مذاق بن چکا ہے۔ انہوں نے کہا کہ نریندر مودی کی باتیں سنجیدہ نہیں لینی چاہئیں، بھارتی پارلیمنٹ میں نریندر مودی کو شرمندگی کا سامنا کرنا پڑا، بھارتی میڈیا اور فوج خود کہہ رہی ہے کہ جہاز گرے، اب نریندر مودی کو بھی مان لینا چاہیے، نریندر مودی کا سورج غروب ہوچکا، سیاسی خاک ختم ہوچکی، اب بحال ہونا ناممکن ہے۔

خواجہ آصف نے کہا کہ بڑی طاقتوں کی جانب سے فلسطینیوں پر قحط نازل کیا گیا اب ان کی قربانیاں رنگ لارہی ہیں، جس طرح غزہ کے بچوں کو بھوکا مارا جارہا ہے یہ انسانیت کے لیے قابلِ شرم ہے۔ بھوک، قحط اور افلاس سے جو لوگ مارے جارہے ہیں ان کی تعداد اس سے زیادہ ہے۔ انہوں نے کہاکہ برطانیہ اور فرانس کا فلسطینی ریاست کو تسلیم کرنا بہت اہم نکتہ ہے، برطانیہ پر یہ قرض ہے کیونکہ یہ اسرائیلی ریاست برطانیہ نے بنائی ہے، 1921 میں جو ڈیکلریشن آیا تھا اس کی سازش برطانیہ نے خود کی تھی۔انہوں نے کہا کہ برطانیہ فلسطینی قوم کے اوپر اپنا قرض اتارے، اب وقت ہے کہ ماضی میں جو گناہ اور جرم برطانیہ نے کیے، وہ فلسطینیوں کے ساتھ کھڑا ہو، برطانیہ فلسطینیوں کے ساتھ کیے گئے مظالم کا ازالہ کرے۔