اپوزیشن ذہنی بیماری کا شکار ہو چکی ہے، تحریک انصاف کے پاس نہ پالیسی ہے نہ وژن، صرف تنقید برائے تنقید، ملک کو ڈیفالٹ کے دہانے پر پہنچانے والے آج ملکی ترقی پر تنقید کر رہے ہیں، عطاء اللہ تارڑ

اسلام آباد (اُردو پوائنٹ اخبارتازہ ترین - اے پی پی۔ 01 اگست2025ء) وفاقی وزیر اطلاعات و نشریات عطاء اللہ تارڑ نے کہا ہے کہ اپوزیشن ذہنی بیماری کا شکار ہو چکی ہے، تحریک انصاف کے پاس نہ پالیسی ہے نہ وژن، صرف تنقید برائے تنقید، ملک کو ڈیفالٹ کے دہانے پر پہنچانے والے آج ملکی ترقی پر تنقید کر رہے ہیں، 9 مئی کے حقائق قوم کے سامنے ہیں، اپوزیشن کے پاس اس کا جواب نہیں۔

جمعہ کے روز اپوزیشن کی پریس کانفرنس پر ردعمل دیتے ہوئے وفاقی وزیر اطلاعات نے کہا کہ تحریک انصاف کا اعلامیہ مضحکہ خیز اور جھوٹ پر مبنی ہے جس کا حقیقت سے کوئی تعلق نہیں، جب ہمیں حکومت ملی تو معیشت دیوالیہ ہونے کے قریب تھی جبکہ تحریک انصاف والے دعائیں مانگ رہے تھے کہ پاکستان ڈیفالٹ کر جائے، وہ آئی ایم ایف کو خطوط لکھ رہے تھے لیکن آج معیشت مستحکم ہو رہی ہے جو انہیں ہضم نہیں ہو رہی۔

(جاری ہے)

انہوں نے کہا کہ ملک کی تاریخ میں پہلی بار کرنٹ اکائونٹ سرپلس ہوا ہے، زرمبادلہ کے ذخائر میں اضافہ ہوا ہے، مہنگائی 38 فیصد سے کم ہو کر سنگل ڈیجٹ پر آ گئی ہے، پالیسی ریٹ 22 فیصد سے کم ہو کر 11 فیصد تک آ چکا ہے اور سٹاک مارکیٹ میں مسلسل بہتری دیکھنے میں آ رہی ہے، یہ تمام عوامل ملکی معیشت پر سرمایہ کاروں کے اعتماد کا مظہر ہیں۔ انہوں نے کہا کہ اپوزیشن نہ تحقیق کرتی ہے اور نہ ہی کوئی ٹھوس بیانیہ پیش کر سکی، ان کا اعلامیہ گھسا پٹا اور حقائق سے عاری ہے جس میں نہ کوئی اعداد و شمار ہیں نہ ہی کسی پالیسی کا ذکر۔

انہوں نے کہا کہ وزیراعظم شہباز شریف نے خصوصی کاوشوں سے تنخواہ دار طبقے پر ٹیکس کم کیا، تنخواہوں میں اضافہ کیا، عوام دوست بجٹ پیش کیا۔ اپوزیشن کو بجٹ یا معاشی اشاریوں پر تنقید کا کوئی جواز نہیں ملا۔ عطاء اللہ تارڑ نے کہا کہ مصطفی نواز کھوکھر رئیل اسٹیٹ مافیا کا حصہ رہے ہیں اور اب قوم کو اخلاقیات کا درس دے رہے ہیں، وہ اپنے اثاثوں کے بارے میں بھی قوم کو بتائیں، سب جانتے ہیں کہ انہوں نے اپنے ذرائع آمدن کیسے بڑھائے ہیں۔

وفاقی وزیر نے کہا کہ اپوزیشن صرف تنقید برائے تنقید کرتی ہے، ان کے پاس نہ کوئی معاشی پالیسی ہے اور نہ کوئی روڈ میپ، وہ صرف رٹے رٹائے جملے دوہراتے ہیں، انہوں نے کبھی کوئی وائٹ پیپر دیا، نہ ہی معیشت پر کوئی ٹھوس بات کی، یہ ذہنی بیماری کا شکار ہو چکے ہیں، ان کے پاس دلیل نہیں، چند الفاظ یاد کر کے ٹی وی چینلز پر دہراتے ہیں۔ انہوں نے کہا کہ ہر بار جب پاکستان میں کوئی اہم غیر ملکی وفد یا سربراہ آتا ہے تو تحریک انصاف اس دورے کو سبوتاژ کرنے کی کوشش کرتی ہے، کل ایرانی صدر پاکستان آ رہے ہیں جو پاکستان کی خارجہ پالیسی کے لئے ایک اہم سنگ میل ہے، پوری قوم ان کے استقبال کی منتظر ہے جبکہ اپوزیشن اس موقع پر منفی بیانیہ پھیلا رہی ہے۔

انہوں نے کہا کہ تحریک انصاف مختلف حصوں اور مختلف گروپوں میں بٹ چکی، علی امین گنڈاپور کے حالیہ بیان کو بھارت اپنے مفاد کے لئے استعمال کر رہا ہے جو افسوسناک ہے۔ انہوں نے کہا کہ معرکہ حق میں پاکستان کو شاندار فتح نصیب ہوئی، آپریشن بنیان مرصوص کی کامیابی کا پورے ملک میں جشن منایا گیا جبکہ اپوزیشن ایسے وقت میں بھی دشمن کے بیانیہ کو فروغ دیتی رہی۔

انہوں نے کہا کہ بانی چیئرمین پی ٹی آئی کے دور میں ملک تنہائی کا شکار تھا، مشرق اور مغرب سے تعلقات خراب تھے کیونکہ وہ خارجہ پالیسی کی اہمیت اور نزاکت کو سمجھنے سے قاصر رہے، ان کے دور میں ملک ڈیفالٹ کے دہانے پر کھڑا تھا اور انہوں نے اپنے رویے اور ناقص پالیسیوں کی وجہ سے ملک کو ناقابل تلافی نقصان پہنچایا۔ انہوں نے کہا کہ اپویشن کی پریس کانفرنس چوں چوں کا مربہ تھی، ان کے پاس دلائل اور حقائق نہیں تھے، جھوٹ، فساد، انتشار اور پروپیگنڈے کے علاوہ ان کے اعلامیہ میں کچھ نہیں تھا، ذاتی مفاد کی خاطر ان کی چیخیں نکل رہی ہیں، ان کے رہنما نے 190 ملین پائونڈ کی کرپشن کی اور آج خود کو بے قصور ثابت کرنے کی بجائے واویلا کر رہے ہیں۔

انہوں نے کہا کہ نو مئی کے مقدمات کا ٹرائل شفاف اور قانون کے مطابق ہوا، دو سال تک عدالت میں کیس چلا، شواہد پیش کئے گئے لیکن دفاع کے لئے تحریک انصاف کے پاس کچھ نہ تھا، کیمرے کی آنکھ نے سب کچھ محفوظ کیا کہ کس طرح شہداء کی یادگاروں کی بے حرمتی کی گئی اور جلائو گھیرائو کیا گیا، یہ مناظر قوم کے سامنے ہیں جنہیں جھٹلایا نہیں جا سکتا۔ انہوں نے کہا کہ اپوزیشن کے پاس 9 مئی کے مقدمات کا جواب نہیں ہے تو اس طرح کی پریس کانفرنسیں کر کے چیخ و پکار کی جا رہی ہے جس کا کوئی جواز نہیں۔ انہوں نے کہا کہ یہ ناکام سیاستدان ہیں، حالیہ پاک بھارت کشیدگی کے دوران بھی یہ بھارتی بیانیہ کو آگے لے کر چلتے رہے۔ انہوں نے کہا کہ پاکستان انشاء اللہ ترقی کرے گا اور عوام دشمن عناصر کو شکست ہوگی۔