قوم (آکل )یوم استحصال کشمیر منائے گی، فسادی ملک کیخلاف گوریلا جنگ لڑیں گے‘ عظمیٰ بخاری

لاہور (اُردو پوائنٹ اخبارتازہ ترین - این این آئی۔ 04 اگست2025ء) وزیر اطلاعات پنجاب عظمیٰ بخاری نے کہا ہے کہ پوری قوم کل ( منگل ) 5اگست کو یوم استحصال کشمیر منائے گی اور فسادی ملک کے خلاف گوریلا جنگ لڑیں گے،یہ سیاسی نہیں بلکہ ایک فاشسٹ گروہ ہے، بانی پی ٹی آئی اپنے بچوں کو ہوا نہیں لگنے دیتے، قوم کے بچوں کو 26سال سے جنون کا درس دے رہے ہیں،9مئی وہ واقعہ ہے جس کی معافی نہیں ہو سکتی ورنہ ہر روز ملک میں ایسے واقعات ہوں۔

لاہور میں پریس کانفرنس کرتے ہوئے صوبائی وزیر عظمی بخاری کا کہنا تھا کہ آج ( منگل ) پوری قوم یوم استحصال کشمیر جوش وجذبے کے ساتھ منائے گی، کشمیر کی آزادی تک کوئی پاکستانی سکون سے نہیں بیٹھ سکتا، سفارتی سطح پر کشمیریوں کی ہر اخلاقی مدد کریں گے لیکن ایک فتنہ گروہ نے اپنی تحریک کیلئے آج 5اگست کے دن کا ہی انتخاب کیا ہے۔

(جاری ہے)

انہوں نے کہا کہ آج (منگل ) دوبارہ فتنہ و فساد کی کال دی گئی ہے، فتنہ گروہ کے ایک لیڈر نے اپنی تحریک کو گوریلا جنگ کا نام دیا ہے، یہ سیاسی جماعت نہیں بلکہ ایک فاشسٹ گروہ ہے، پہلے بھی ان کی جانب سے کئی بار احتجاج کی کال دی گئی جو ناکام ہو گئی۔

ان کا کہنا تھا کہ عاشورہ کے بعد بھی ایک احتجاجی تحریک چلنی تھی، اب انہوں نے 5اگست کی کال دی ہے، علیمہ باجی کہتی ہیں مجھے 5اگست کا احتجاج ہوتا نظر نہیں آتا۔وزیر اطلاعات نے کہا کہ مجھے ان لوگوں سے دلی ہمدردی ہے جو کہتے ہیں ہم کوئی غلام ہیں، پہلے یہ امریکہ سے آزادی مانگ رہے ہیں اور آج بانی کے بیٹے دوبارہ امریکہ کے در پر جا رہے ہیں، اپنے بچوں کو ہوا نہیں لگنے دیتے، قوم کے بچوں کو 26سال سے جنون کا درس دے رہے ہیں، اب حالت یہ ہے کہ ضمنی انتخابات سے بھی بھاگ گئے ہیں، یہ سمبڑیال اور مریدکے میں اپنا حال دیکھ چکے ہیں، ان کے عوامی مقبولیت کے غبارے سے ہوا نکل رہی ہے۔

عظمیٰ بخاری نے کہا کہ 9مئی وہ واقعہ ہے جس کی معافی نہیں ہو سکتی ورنہ ہر روز ملک میں ایسے واقعات ہوں، ان کی ملک دشمنی کی ایک پوری فہرست ہے، آئی ایم ایف کو خطوط لکھے گئے، ملک اور اداروں کے سربراہ کے خلاف مہم چلائی گئی، کیا فتنہ و فساد پارٹی نام کی رکاوٹ سے جان چھڑائے بغیر پاکستان کو آگے لے جایا جا سکتا ہی ۔ انہوں نے کہا کہ کہ ترقی کرتا پنجاب مخالفین کو ہضم نہیں ہو رہا، پنجاب میں خواتین کو بااختیار بنانے کیلئے اقدامات ہو رہے ہیں، پاکستان اور ایران نے ٹریڈ کو 10 ارب ڈالرز تک لے جانے کا اعادہ کیا۔

صوبائی وزیر کا مزید کہنا تھا کہ پنجاب میں بچوں کو سکالرشپس، ای بائیکس اور لیپ ٹاپس مل رہے ہیں، پنجاب میں ترقیاتی کام ہو رہے ہیں، صوبے میں اینٹی سموگ گنز پہنچا دی گئی ہیں، لاہور میں 15اینٹی سموگ گنز آ چکی ہیں، پہلے کسی نے سموگ کے تدارک کیلئے کچھ نہیں کیا۔