کشمیریوں کی دعائیں قبول ہونے اور ظلم کے خاتمے کا وقت قریب ہے‘ عظمیٰ بخاری

کشمیر کو جیل بنا دیا گیا، ڈونلڈ ٹرمپ بھی اب کشمیر کی بات کر رہے ہیں‘وزیر اطلاعات پنجاب

منگل 5 اگست 2025 16:15

کشمیریوں کی دعائیں قبول ہونے اور ظلم کے خاتمے کا وقت قریب ہے‘ عظمیٰ ..

لاہور (اُردو پوائنٹ اخبارتازہ ترین - این این آئی۔ 05 اگست2025ء) وزیر اطلاعات پنجاب عظمیٰ بخاری نے کہا ہے کہ کشمیریوں کی دعائیں قبول ہونے اور ظلم کے خاتمے کا وقت قریب ہے۔یومِ استحصالِ کشمیر پر تقریب سے خطاب کرتے ہوئے صوبائی وزیر عظمی بخاری کا کہنا تھا کہ آج پورے پاکستان میں یوم استحصال کشمیر منایا جا رہا ہے، ڈونلڈ ٹرمپ بھی اب کشمیر کی بات کر رہے ہیں، کشمیر کو جیل بنا دیا گیا، اقوام متحدہ کی قراردادیں موجود ہیں کہ کشمیر کو حق ملنا چاہیے۔

انہوں نے کہا کہ دنیا کو باور کرانا ہے کشمیر بنے گا پاکستان، کشمیریوں کی دعائیں قبول ہونے اور ظلم کے مٹنے کا وقت قریب ہے۔ان کا کہنا تھا کہ وزیراعلی مریم نواز اور حکومت پنجاب کی جانب سے کشمیریوں سے یکجہتی کا اظہار کرتی ہوں، کشمیری وہ قوم ہے جو نہ کبھی ڈری اور نہ کبھی جھکی ہے، برہان وانی کسی کو نہیں بھولا اور نہ کبھی بھولے گا۔

(جاری ہے)

عظمی بخاری نے کہا کہ بھارت نے 7مئی کو پاکستان کے خلاف جارحیت کرنے کی ناکام کوشش کی، پاکستان نے بھارت کو چند گھنٹے میں شکست دی، آج بھارت سفارتی تنہائی کا شکار ہے۔

صوبائی وزیر نے پی ٹی آئی کو تنقید کا نشانہ بناتے ہوئے کہا کہ ایک پارٹی کی جانب سے آج پھر ایک فتنے کی کال دی گئی ہے، والدین خدارا اپنے بچوں کو کسی بھی شرپسندی اور فتنے کی سیاست سے دور رکھیں۔