سینیٹ میں اقلیتی کاکس قائم کرنے کا نوٹیفکیشن جاری کر دیا گیا

اسلام آباد (اُردو پوائنٹ اخبارتازہ ترین - این این آئی۔ 11 اگست2025ء)چیئرمین سینیٹ سید یوسف رضا گیلانی نے اقلیتوں کے عالمی دن کے موقع پر پاکستان کے ایوانِ بالا میں اقلیتوں سے متعلق اقلیتی کاکس تشکیل دینے کا اعلان کر دیا ہے اور اس سلسلے میں باضابطہ نوٹیفکیشن جاری کر دیا گیا ہے۔ اس کاکس میں قومی اسمبلی کے اراکین کو بھی نمائندگی دی جائے گی، جن کی نامزدگی اسپیکر قومی اسمبلی کریں گے، چیئرمین سینٹ اور سپیکر قومی اسمبلی کے مابین پارلیمانی کاکس کے قیام کے حوالے سے پائی جاتی ہے۔

اعلامیہ کے مطابق چیئرمین سینیٹ نے ایوان بالا میں اقلیتی برادری سے تعلق رکھنے والے اراکین سینیٹ کی جانب سے مطالبے پر یہ اہم پارلیمانی کاکس تشکیل دیا۔ اس کاکس کے قیام کا مقصد ملک میں بسنے والی اقلیتوں کے ائینی و قانونی حقوق کا تحفظ متعلقہ قوانین پر موثر عمل درامد اور ایسی پالیسیوں کی ترویج ہے جو برداشت، تنوع کے احترام اور بین المذاہب ہم اہنگی کو فروغ دیں ،اس کاکس کے بانی اراکین میں سینیٹر دنیش کمار, سینٹر خلیل طاہر سندھو ، گردیپ سنگھ ، پونجو مل بھیل شامل ہیں۔

(جاری ہے)

ابتدائی اجلاس میں یہ کاکس اپنے ٹرمز اف ریفرنس( ٹی او آرز )مرتب اور منظور کرے گا جن میں اس کے سٹریٹیجک مقاصد ,رہنما اصول اور حکومتی اداروں, سول سوسائٹی اور متعلقہ سٹیک ہولڈرز سے موثر روابط کے طریقہ کار شامل ہوں گے،چیئرمین سینیٹ نے اپنے خصوصی بیان میں کہا کہ خواتین اور اقلیتوں کی فلاح و بہبود ہمیشہ ان کی ترجیحات میں شامل رہی ہے۔

انہوں نے کہا کہ بطور وزیراعظم بھی انہوں نے ہمیشہ اس بات کو یقینی بنایا کہ خواتین اور اقلیتوں کو قومی ترقی کے مرکزی دھارے میں شامل کیا جائے اور انہیں بھرپور نمائندگی فراہم کی جائے۔سید یوسف رضا گیلانی نے کہا کہ شہید محترمہ بے نظیر بھٹو نے بھی اقلیتوں اور خواتین کی ترقی و خوشحالی اور زندگی کے ہر شعبے میں ان کی شمولیت کے لیے نمایاں خدمات انجام دیں۔

انہوں نے مزید کہا کہ پاکستان پیپلز پارٹی کے چیئرمین بلاول بھٹو زرداری کی بھی خواہش ہے کہ خواتین کو زندگی کے ہر شعبے میں آگے لایا جائے، انہیں بااختیار بنایا جائے اور قومی اداروں میں ان کی شمولیت کو یقینی بنایا جائے۔انہوں نے کہا کہ صدر پاکستان آصف علی زرداری بھی اقلیتوں کے حقوق کے تحفظ اور انہیں زندگی کے تمام شعبوں میں مساوی مواقع فراہم کرنے کے لیے پرعزم ہیں۔

چیئرمین سینیٹ نے ملازمتوں میں خواتین اور اقلیتوں کے کوٹے میں اضافے اور ایوانِ بالا میں اقلیتوں کو چار فیصد نمائندگی دینے کے لیے کی جانے والی کوششوں کا بھی ذکر کیا۔ ان کا کہنا تھا کہ اعلیٰ فیصلہ سازی کے عمل میں خواتین اور اقلیتوں کو بھرپور نمائندگی دینا ان معاشرتی ناانصافیوں کے ازالے میں مددگار ہوگا، جن کی وجہ سے یہ طبقات ماضی میں اپنی صلاحیتوں کا مکمل استعمال نہیں کر سکے۔

انہوں نے کہا کہ مجوزہ پارلیمانی کاکس اقلیتوں کے حقوق کے تحفظ، فروغ اور نمائندگی کو یقینی بنانے کے لیے فعال کردار ادا کرے گا۔ مزید برآں، سینیٹ کے آئندہ اجلاس میں ایک خصوصی قرارداد بھی پیش کی جائے گی تاکہ پاکستان کی ترقی و خوشحالی میں اقلیتوں کے کردار کو باضابطہ طور پر تسلیم کیا جا سکے۔چیئرمین سینیٹ نے اس بات کو تسلیم کیا کہ اقلیتوں نے ہمیشہ پاکستان کی ترقی، خوشحالی اور بین المذاہب ہم آہنگی کے فروغ میں کلیدی کردار ادا کیا ہے۔

انہوں نے کہا کہ پاکستان ایک کثیرالثقافتی ملک ہے جہاں ہر زبان، ہر عقیدے اور ہر ثقافت سے تعلق رکھنے والے شہری ملک کی ترقی اور استحکام میں بھرپور حصہ ڈال رہے ہیں۔ چیئرمین سینیٹ نے اس امید کا اظہار کیا کہ اقلیتی کاکس معاشرے کی پسماندہ اور محروم طبقات کی مضبوط اواز بن کر سامنے ائے گا اور ایک زیادہ شمولیتی ، روادار اور پرامن پاکستان کے قیام میں اہم کردار ادا کرے گا