گورنرہاؤس میں جشنِ آزادی کی تقریب، آتش بازی کا عالمی ریکارڈ قائم

بدھ 13 اگست 2025 21:47

کراچی (اُردو پوائنٹ اخبارتازہ ترین - این این آئی۔ 13 اگست2025ء)گورنر سندھ کامران خان ٹیسوری کی میزبانی میں "معرکہ حق ط جشنِ آزادی" کی شاندار تقریب گورنر ہاؤس کراچی میں منعقد ہوئی، جس میں دنیا کی طویل ترین ایک گھنٹہ 16 منٹ کی آتش بازی کا عالمی ریکارڈ قائم کیا گیا۔ تقریب میں عالمی شہرت یافتہ گلوکار علی ظفر اور کیفی خلیل نے شاندار فن کا مظاہرہ کیا۔

دونوں فنکاروں نے ایسا دلفریب سٴْروں کا جادو جگایا کہ سامعین سحر میں کھو کر جھوم اٴْٹھے۔اس موقع پر خطاب کرتے ہوئے گورنر سندھ کامران خان ٹیسوری نے کہا کہ گورنر ہاؤس کے دروازے عوام کی خدمت کے لئے 24 گھنٹے کھلے ہیں، اور جب تک میں یہاں موجود ہوں، یہ عوام کا گورنر ہاؤس ہے۔ انہوں نے کہا کہ بھارت کو پاک افواج نے ایسی دھول چٹائی کہ نسلیں یاد رکھیں گی۔

(جاری ہے)

بھارت کے پانچ طیارے گرائے گئے اور دشمن کو منہ کی کھانی پڑی۔ بھارتیو! تم نے غلطی کی، اس قوم کو چھیڑا، آج پوری قوم جشن منا رہی ہے، اور اگر دوبارہ چھیڑا تو پورا سال جشن منائیں گے۔ گورنر سندھ نے مزید کہا کہ گورنر ہاؤس اور اس کی ٹیم جو وعدہ کرتے ہیں، وہ پورا کرتے ہیں۔ تمام اداروں کا شکریہ جنہوں نے اس تقریب کو کامیاب بنانے میں کردار ادا کیا۔

آخر میں انہوں نے پاک افواج کو سلام پیش کیا۔ تقریب میں ایم کیو ایم پاکستان کے چیئرمین و وفاقی وزیر ڈاکٹر خالد مقبول صدیقی، مرکزی سینئر رہنما ڈاکٹر فاروق ستار، انیس قائم خانی، سندھ اسمبلی میں قائد حزبِ اختلاف علی خورشیدی، اراکینِ قومی و صوبائی اسمبلی، فنکاروں، کاروباری برادری سے تعلق رکھنے والے افراد سمیت عوام کی ایک بڑی تعداد نے شرکت کی۔