اے میرے وطن کے نوجوانو ، یہ وطن تم سے ہے، 14 اگست کے حوالے سے شاہد آفریدی کا جذباتی پیغام

قربانیوں کی خوشبو سے مہکتا یہ چمن، تمہارے خواب ہیں تمہارے عمل کے منتظر ہیں : سابق کپتان

Zeeshan Mehtab ذیشان مہتاب جمعرات 14 اگست 2025 11:54

اے میرے وطن کے نوجوانو ، یہ وطن تم سے ہے، 14 اگست کے حوالے سے شاہد آفریدی ..
لاہور (اردو پوائنٹ تازہ ترین اخبار ۔ 14 اگست 2025ء ) قومی کرکٹ ٹیم کے سابق سٹار آل راؤنڈر شاہد خان آفریدی کا 14 اگست کے حوالے سے جذباتی پیغام سامنے آگیا۔ 
سماجی رابطے کے پلیٹ فارم ’ایکس‘ پر ملک کی 79 ویں یوم آزادی کی مناسبت سے شاہد آفریدی نے اپنے پیغام میں لکھا کہ ’اے میرے وطن کے نوجوانو ، یہ وطن تم سے ہے، قربانیوں کی خوشبو سے مہکتا یہ چمن، تمہارے خواب ہیں تمہارے عمل کے منتظر ہیں‘‘۔

 
 
واضح رہے کہ ملک بھر میں آج78 واں یوم آزادی ملی جوش و جذبے کے ساتھ منایا جا رہا ہے ، دن کےآغاز پر توپوں کی سلامی دی گئی اور نماز فجر میں ملکی ترقی، یکجہتی،امن اور خوشحالی کے لیے خصوصی دعائیں کی گئیں۔ 
پاکستان کا 78واں یومِ آزادی قوم کو مبارک ہو! رات 12 بجتے ہی ملک بھر میں جشن شروع ہوگیا۔

(جاری ہے)

آزادی کا جشن، ملک کا ہر شہر ،ہر گلی، محلہ سبز ہلالی پرچم کے رنگوں میں رنگ گیا۔

کراچی، لاہور، اسلام آباد، پشاور، کوئٹہ اور ملتان سمیت ملک کے کونے کونے میں چراغاں اور آتش بازی کا مظاہرہ کیا گیا۔ یوم آزادی منانے شہری سڑکوں پرنکل آئے، جگہ جگہ جشن آزادی پر ریلیاں نکالی جا رہی ہیں۔ 
 علاوہ ازیں بدھ کو جناح اسپورٹس کمپلیکس اسلام آباد میں یومِ آزادی اورمعرکہ حق کی فتح کی تقریب منعقد کی گئی۔تقریب میں صدر، وزیرِاعظم اور تینوں مسلح افواج کے سربراہان شریک ہوئے۔

 
تقریب میں وفاقی کابینہ کے ارکان، قومی اسمبلی اورسینیٹ ارکان اوردوست ممالک کے سفراء سمیت بڑی تعداد میں شہری بھی شریک ہوئے۔ تقریب میں تینوں مسلح افواج پر مشتمل میوزک بینڈ کا شاندار مارچ پاسٹ کیا جبکہ پاک آرمی، پاک بحریہ اور پاک فضائیہ کے چاق چوبند دستوں سمیت پنجاب رینجرز، ایف سی خیبرپختونخوا کے دستوں نے بھی مارچ پاسٹ کیا۔

 
یومِ آزادی اور معرکہ حق کی فتح کی تقریب میں وزیراعظم نے یادگارِ معرکہ حق کے ماڈل کی نقاب کشائی بھی کی۔ بعد ازاں لاہور میں دن کےآغاز پر 21 توپوں کی سلامی دی گئی اور نماز فجر میں ملکی ترقی، یکجہتی،امن اور خوشحالی کے لیے خصوصی دعائیں بھی کی گئیں۔ 
کوئٹہ میں بھی یوم آزادی کے موقع پر دن کےآغاز پر کینٹ میں 21 توپوں کی سلامی دی گئی اور مساجد میں نماز فجرمیں ملک کی سلامتی کے لیے خصوصی دعائیں کی گئیں۔ 
جشن آزادی پر مزار قائد کراچی اور مزار اقبال لاہور میں گارڈز کی تبدیلی کی پروقار تقا ریب ہوئیں۔