وزیر صحت خواجہ سلمان رفیق کی علامہ اقبال میڈیکل کالج میں یوم آزادی کی تقریب میں شرکت ، نئی سکلز لیب کا افتتاح

لاہور (اُردو پوائنٹ اخبارتازہ ترین - این این آئی۔ 14 اگست2025ء)صوبائی وزیر صحت خواجہ سلمان رفیق نے علامہ اقبال میڈیکل کالج یوم آزادی کے سلسلہ میں منعقدہ تقریب میں بطور مہمان خصوصی شرکت کی۔صوبائی وزیر نے نئی سکلز لیب کا افتتاح بھی کیا۔اس موقع پر پرنسپل پروفیسر طیبہ وسیم، ایڈیشنل سیکرٹری ٹیکنیکل محکمہ سپیشلائزڈ ہیلتھ کیئر اینڈ میڈیکل ایجوکیشن ڈاکٹر محمد وسیم، ایم ایس جناح ہسپتال ڈاکٹر سید محسن علی شاہ، پروفیسر نوید اقبال، پروفیسر ماہ جبین منیرہ،، پروفیسر خالد محمود، پروفیسر اشرف ضیاء، و دیگر فیکلٹی ممبران کے ساتھ طلباء و طالبات کی کثیر تعداد نے شرکت کی۔

صوبائی وزیر صحت خواجہ سلمان رفیق نے اس موقع پر پرچم کشائی بھی کی۔صوبائی وزیر صحت نے اس موقع پر جشن آزادی کا کیک بھی کاٹا۔

(جاری ہے)

صوبائی وزیر صحت خواجہ سلمان رفیق نے تقریب کے شرکاء سے اظہار خیال کرتے ہوئے کہاکہ آج تمام سرکاری طبی اداروں میں یوم آزادی کے سلسلہ میں تقاریب کا اہتمام کیا گیا ہے،آزادی رب العزت کی ایک انمول نعمت ہے جس کی قدر کرنی چاہئے۔

ہم نے پاکستان لاکھوں قربانیوں کے بعد حاصل کیا ہے۔یوم آزادی کے موقع پر قائد اعظم پاکستان محمد علی جناح اور مفکر پاکستان علامہ اقبال کو خراجِ تحسین پیش کرتے ہیں۔جشن آزادی کے موقع پر سرحدوں پر فرائض سر انجام دینے والے جوانوں کو خراج تحسین پیش کرتے ہیں۔ خواجہ سلمان رفیق نے کہاکہ وزیر اعلیٰ پنجاب مریم نواز شریف کے ویژن کے مطابق عوام تک صحت کی بہترین سہولیات کی فراہمی کیلئے کوشاں ہیں۔

78 واں یومِ آزادی، اجداد کی لازوال قربانیوں کو یاد کرنے اور شکر بجا لانے کا دن ہے۔14 اگست تجدید عہد کا دن کہ پاکستان کو ترقی کی راہ پر گامزن رکھنے کیلئے اپنی تمام تر صلاحیتیں بروئے کار لائیں گے۔عوامی خدمت، قانون کی بالادستی اور معاشی استحکام ہمارا مشن ہے۔وقت کے گزرنے کے ساتھ ساتھ جشن آزادی کی شان و شوکت میں اضافہ ہوتا جا رہا ہے۔

ساملی مری میں اسٹیٹ آف دی آرٹ نواز شریف کارڈیالوجی سنٹر بنا رہے ہیں۔آج کے دن ہم فلسطین اور کشمیر کی آزادی کیلئے بھی دعا گو ہیں۔ خواجہ سلمان رفیق نے کہاکہ لاہور میں اسٹیٹ آف دی آرٹ نواز شریف انسٹی ٹیوٹ آف کینسر ٹریٹمنٹ اینڈ ریسرچ بنایا جا رہا ہے۔لاہور اور سرگودھا میں اسٹیٹ آف دی آرٹ نواز شریف انسٹی ٹیوٹس آف کارڈیالوجی بنائے جا رہے ہیں۔پنجاب کی طبی درسگاہوں سے فارغ التحصیل ہونے والے بچے پوری دنیا میں پاکستان کا نام روشن کر رہے ہیں،اللہ تعالیٰ نے پوری دنیا میں ہمیشہ ازلی دشمن بھارت پر فتح نصیب فرمائی۔وزیر اعلیٰ پنجاب مریم نواز شریف کی قیادت میں نئے ہسپتال بنائے جا رہے ہیں۔