وفاقی وزیر امیر مقام کا سیلاب سے متاثرہ ضلع بونیر کے مختلف علاقوں کا دورہ‘ نقصانات اور امدادی سرگرمیوں کا جائزہ لیا

ہفتہ 16 اگست 2025 23:01

بونیر (اُردو پوائنٹ اخبارتازہ ترین - آن لائن۔ 16 اگست2025ء)وفاقی وزیر و صدر پاکستان مسلم لیگ ن خیبرپختونخوا انجینئر امیر مقام نے سیلاب سے متاثرہ ضلع بونیر کے مختلف علاقوں کا دورہ کیا۔امیرمقام نے سیلاب سے متاثرہ علاقوں میں نقصانات اور امدادی سرگرمیوں کا جائزہ لیا۔انجینئرامیر مقام نے کہا کہ یہ سیاست کا وقت نہیں، پوری قوم متاثرین کے ساتھ ہے‘وفاقی حکومت تمام وسائل فراہم کرے گی، متاثرین کو تنہا نہیں چھوڑا جائے گا۔

وزیر اعظم شہبازشریف کی ہدایت پر سیلاب متاثرہ علاقوں کا دورہ کر رہا ہوں‘وزیراعظم شہباز شریف متاثرہ اضلاع کا جلد دورہ کریں گے۔وزیراعظم شہباز شریف امدادی سرگرمیوں کی خود نگرانی کر رہے ہیں۔انجینئرامیر مقام نے متاثرہ خاندانوں سے ملاقات اور تعزیت کی۔

(جاری ہے)

امیر مقام نے کہا کہ بونیر میں جاری ریسکیو آپریشن انتظامیہ، پاک فوج اور ایف سی کے جوان حصہ لے رہے ہیں۔

کئی گاؤں مکمل تباہ، متعدد لاپتہ افراد کی جلد ریکوری کیلئے دعا گو ہیں، متاثرہ علاقوں میں میڈیکل کیمپس قائم کئے گئے ہیں، وفاقی حکومت تمام وسائل فراہم کرے گی، متاثرین کو تنہا نہیں چھوڑا جائے گا۔ امیرمقام نے کہا کہ 2005 کے زلزلے، 2010 اور 2022 کے بعد یہ بڑا قدرتی سانحہ ہے۔بونیر میں عارضی راستوں کی بحالی کیلئے کوششیں جاری ہیں۔ ریسکیو آپریشن کے دوران کئی لاشیں نکالی گئیں جبکہ متعدد افراد کی تلاش جاری ہے،وزیراعظم شہباز شریف متاثرہ اضلاع کا جلد دورہ کریں گے۔

وفاقی وزیر نے حالیہ طوفانی بارشوں میں شہید ہونے والوں کی درجات کی بلندی کیلئے دعا کی۔اس موقع پر کمشنر مالاکنڈ ڈویژن، ڈپٹی کمشنر بونیر، ضلعی انتظامیہ، ڈی پی او سمیت وفاقی محکموں پیسکو اور پی ٹی اے سمیت دیگر محکموں کے اعلیٰ حکام بھی موجود تھے۔