پولیو کے مکمل خاتمے کیلئے شعبہ صحت کی ٹیم، پولیو ورکرز اور تمام متعلقہ ادارے پر عزم ہیں، وزیراعظم

منگل 19 اگست 2025 17:11

اسلام آباد (اُردو پوائنٹ اخبارتازہ ترین - این این آئی۔ 19 اگست2025ء)وزیراعظم محمد شہباز شریف نے کہا ہے کہ ملک سے پولیو کے مکمل خاتمے کیلئیشعبہ صحت کی ٹیم، پولیو ورکرز اور تمام متعلقہ ادارے پر عزم ہیں،پولیو کے خاتمے میں مشکلات ہیں مگر یہ ناممکن نہیں،پولیو مہمات میں پولیو ورکرز کا کلیدی کردار قابل تحسین ہے۔منگل کو وزیراعظم آفس کے میڈیا ونگ کی طر ف سے جاری بیان کے مطابق وزیراعظم محمد شہباز شریف نے ان خیالات کا اظہار روٹری انٹرنیشنل فاؤنڈیشن کے صدر فرانسسکو اریزو کی سربراہی میں ملاقات کیلئے آئے وفد سے گفتگوکرتے ہوئے کیا۔

ملاقات میں وفاقی وزیرِ صحت سید مصطفی کمال، وزیرِ اعظم کی انسداد پولیو کیلئے خصوصی نمائندہ عائشہ رضا فاروق اور متعلقہ اعلی حکام موجود تھے۔

(جاری ہے)

وزیراعظم نے روٹری انٹرنیشنل سے پولیوجیسے موذی مرض کے پاکستان سے خاتمے کیلئے باقی بین الاقوامی اداروں کی طرح بھرپور تعاون پراظہار تشکر کیا۔انہوں نے کہا کہ ملک سے پولیو کے مکمل خاتمے کیلئے شعبہ صحت کی ٹیم، پولیو ورکرز اور تمام متعلقہ ادارے پر عزم ہیں، پولیو کے خاتمے کی راہ میں چیلنجز ضرور ہیں مگر ہم اپنے عزم اور محنت سے پاکستان کے بچوں کے مستقبل کو محفوظ بنائیں گے۔

وزیراعظم نے کہا کہ پولیو کے خاتمے میں مشکلات ہیں مگر یہ نا ممکن نہیں،پولیو مہمات میں پولیو ورکرز کا کلیدی کردار قابل تحسین ہے۔ وفد نے حکومت کے انسداد پولیو اقدامات کی تعریف کی اور امید ظاہر کی کہ وزیر اعظم کی خصوصی توجہ اور قیادت کی بدولت پاکستان سے جلد اس موذی مرض کا خاتمہ ممکن ہو جائیگا۔ وفد نے روٹری انٹرنیشنل کے انسداد پولیو کیلئے حکومت کی معاونت جاری رکھنے کے عزم کا اعادہ کیا۔وفد نے وزیراعظم کو بتایا کہ روٹری انٹرنیشنل نے گزشتہ برس 500 ملین ڈالر انسداد پولیو کی مد میں پاکستان میں خرچ کئے اور رواں برس بھی اس مقصد کیلئے خطیر رقم خرچ کرنے کا خواہاں ہے۔ وفد نے وزیر اعظم کی انسداد پولیو کیلئے ٹیم کے انتخاب اور ٹیم کی جانب سے اقدامات کی بھی تعریف کی۔