سندھ حکومت شہید بی بی کے عوام سے کئے گئے وعدوں کو پورا کر رہی ہے، بلاول بھٹو

لاڑکانہ (اُردو پوائنٹ اخبارتازہ ترین - این این آئی۔ 23 اگست2025ء)چیئرمین پاکستان پیپلز پارٹی بلاول بھٹو زرداری نے کہا ہے کہ سندھ کی عوامی حکومت شہید بینظیر بھٹو کے عوام سے کئے گئے وعدوں کو پورا کر رہی ہے، شہید بی بی ملک کے بیٹوں کے ساتھ ساتھ بیٹیوں کی بہبود و ترقی کا بھی خیال رکھتی تھیں۔ میڈیا سیل بلاول ہاوس سے جاری بیان کے مطابق، چیئرمین پیپلز پارٹی بلاول بھٹو نے اِن خیالات کا اظہار لاڑکانہ کے تعلقہ رتو ڈیرو میں یونین کونسل وارث ڈینو کے گاں خیر محمد بروہی میں حکومت سندھ کی جانب سے 2022کے سیلاب سے متاثرہ خاندانوں کے لئے بننے والے اور زیرتعمیر گھروں کے دورے کے موقع پر مالکانہ اسناد دینے کی تقریب کے دوران متاثرین سے بات چیت کرتے ہوئے کیا۔

اس موقع پر پی پی پی شعبہ خواتین کی مرکزی صدر و رکنِ سندھ اسمبلی فریال تالپور بھی چیئرمین بلاول بھٹو زرداری کے ہمراہ موجود تھیں۔

(جاری ہے)

چیئرمین بلاول بھٹو زرداری نے اس موقع پر گفتگو کرتے ہوئے مزید کہا کہ یہ شہید بینظیر بھٹو کا وعدہ تھا کہ وہ عوام کو روٹی، کپڑا اور مکان دلوائیں گی۔ میں بہت خوش ہوں کہ سندھ میں پیپلز پارٹی کی حکومت وہ وعدہ پورا کر رہی ہے اور آپ سب کا گھر یا تو بن گئے ہیں یا بن رہے ہیں۔

انہوں نے مزید کہا کہ حکومتِ سندھ کی کوشش ہے کہ سیلاب متاثرین کے گھروں کی تعمیر کا کام جلد از جلد مکمل ہو جائے اور ان گھروں کے مالکانہ حقوق فوری طور ان خاندانوں کی خواتین کے نام منتقل کر دیئے جائیں۔ انہوں نے اس موقع پر موجود ان تمام خواتین کو مبارکباد دی، جنہیں نئے تعمیر شدہ گھروں کے مالکانہ حقوق کی اسناد حوالے کردی گئیں۔ چیئرمین بلاول بھٹو زرداری نے نشاندھی کرتے ہوئے کہا کہ 21لاکھ سیلاب متاثرہ خاندانوں کے لیے گھروں کی تعمیر کے میگا پروجیکٹ کے ساتھ ساتھ حکومت سندھ ان تمام گھروں کو شمسی بجلی کی سہولت بھی مفت فراہم کر رہے ہیں۔

سندھ حکومت کی جانب سے ایک اور بڑا منصوبہ شروع ہونے والا ہے کہ ہم واش فیسلٹیز کو بھی اِن گھروں میں شامل کریں گے ۔اس لیے پاکستان پیپلز پارٹی کی یہ کوشش ہوگی کہ پورا سندھ میں جہاں جہاں ہم نے یہ نئے گھر بنائے ہیں وہاں نہ صرف سولر پاور کا فیسلٹی دیں مگر ساتھ ساتھ واش کی فیسلٹی بھی دیں۔ دریں اثنا، چیئرمین بلاول بھٹو زرداری نے تعلقہ رتوڈیرو کے گاں زنگیجہ پہنچ کر سندھ پولیس کے شہید کانسٹیبل منیر احمد سومرو کے صاحبزادے منیب الرحمان اور والد غلام قادر ودیگر ورثا سے تعزیت کی اور شہید کے درجات کی بلندی کی دعا کی۔

اس موقع پر پی پی پی سندھ کے صدر نثار احمد کھڑو اور چیئرمین بلاول بھٹو زرداری کے پولیٹیکل سیکریٹری و ایم پی اے جمیل احمد سومرو سمیت اراکین اسمبلی اور دیگر رہنما بھی موجود تھے۔