اپنے زورِ بازو پرجنوبی سندھ صوبہ بنائیں گے۔ آفاق احمد

پیپلز پارٹی سندھو دیش تحریک کیلئے باقاعدہ فنڈنگ کرتی ہے،کالا باغ ڈیم سمیت دیگر آبی ذخائر فوری تعمیر کئے جائیں

جمعہ 29 اگست 2025 22:15

کراچی (اُردو پوائنٹ اخبارتازہ ترین - این این آئی۔ 29 اگست2025ء) ہم اپنی زمین اور قوم کو تقسیم نہیں ہونے دیں گے اس لئے ہم نے کبھی کراچی صوبہ کی بات نہیں کی، ہم جنوبی سندھ صوبہ بنائیں گے تاکہ کراچی سے سکھر تک سندھ کے شہری علاقوں میں بسنے والے مہاجروں کا تحفظ ہوسکے۔ ان خیالات کا اظہار مہاجر قومی موومنٹ (پاکستان) کے چیئرمین آفاق احمد نے ڈسٹرکٹ سینٹرل سے آنے والے سے ملاقات میں کیا۔

آفاق احمد نے کہا کہ کراچی صوبہ بنانے کی باتیں دوسروں کی زبانیں بولنے والے کررہے ہیں، یہ وہی لوگ ہیں کہ جب ہم نے جنوبی سندھ صوبے کا مطالبہ کیا تھا تو انہوں نے اسمبلی میں کھڑے ہوکر صوبے کے قیام کی مخالفت کی تھی ، آج وہ طوطے کی طرح کراچی صوبے کی رٹ لگارہے ہیں جو ہم کسی صورت ہونے نہیں دیں گے بلکہ اس حوالے سے ہونے والے کسی ریفرنڈم کو بھی نہیں ہونے دیں گے۔

(جاری ہے)

آفاق احمد نے کہا کہ پیپلز پارٹی، جئے سندھ کے علیحدگی پسندوں کو پالتی ہے بلکہ انہیں سندھو دیش کی تحریک چلانے کیلئے باقاعدہ فنڈنگ کرتی ہے یہی وجہ ہے کہ اندرون سندھ کھلے عام پاکستان مردہ باد کے نعرے لگ رہے ہیں جس کا مقتدرہ قوتوں کو نوٹس لینا چاہئے۔ آفاق احمد نے کہا کہ کالا باغ ڈیم سمیت دیگر ڈیموں کی تعمیر وقت کی اہم ضرورت ہے کیونکہ آبی ذخائر نہ ہونے کی وجہ سے ہم ہر سال لاکھوں کیوسک پانی سمندر برد کردیتے ہیں، بہتر یہی ہے کہ ڈیموں کی مخالفت کرنے والوں کو خاطر میں نہ لاتے ہوئے جہاں جہاں ضرورت ہو وہاں چھوٹے بڑے ڈیم بنائے جائیں۔