سیلابی صورتحال سے نمٹنے کے لئے ترجیحی بنیادوں پر ڈیمز بنانے کی ضرورت ہے‘سردار سلیم حیدر خان

لاہور (اُردو پوائنٹ اخبارتازہ ترین - این این آئی۔ 30 اگست2025ء) گورنر پنجاب سردار سلیم حیدر خان نے کہا ہے کہ سیلابی صورتحال سے نمٹنے کے لئے ترجیحی بنیادوں پر ڈیمز بنانے کی ضرورت ہے،پیپلزپارٹی کسی صورت سیلاب متاثرین کو تنہا نہیں چھوڑے گی، ریلیف کیمپ میں سیلاب متاثرین کو روزانہ دو وقت کا کھانا دیا جائے گا،حکومت کے ساتھ پوری قوم سیلاب متاثرین کی مدد کے لیے میدان میں نکلے۔

ان خیالات کا اظہار انہوں نے شدید بارش میں بابو صابو ٹول پلازہ کے قریب گورنر ہاوس لاہور اور ہلال احمر کے تعاون سے قائم کردہ ریلیف کیمپ کے دورہ کے دوران میڈیا سے گفتگو کرتے ہوئے کیا۔گورنر پنجاب نے اس موقع پر ریلیف کیمپ میں موجود پناہ گزینوں میں کھانے پینے کی اشیا بھی تقسیم کیں۔گورنر پنجاب سردار سلیم حیدر خان نے کہا کہ سیلاب متاثرین کی مدد اور بحالی میں حکومت کے ساتھ سب کو مل کر کردار ادا کرنا چاہئے۔

(جاری ہے)

انہوں نے کہا کہ شدید بارش میں سیلاب متاثرین اپنے گھروں سے باہر ہیںجسے دیکھ کر دلی افسوس ہوا ہے۔گورنر پنجاب نے کہا کہ وہ اور ان کی پوری ٹیم سیلاب متاثرین کی مدد کے لیے میدان میں ہے۔ انہوں نے کہا کہ وہ گورنر ہائوس لاہور میں سیلاب متاثرین کے لئے ہر وقت حاضر ہیں ۔گورنر پنجاب نے کہا کہ پیپلزپارٹی کسی صورت سیلاب سے متاثرہ لوگوں کو تنہا نہیں چھوڑے گی۔

انہوں نے کہا کہ سیلابی صورتحال سے نمٹنے کے لیے ترجیحی بنیادوں پر ڈیمز بنانے کی ضرورت ہے۔گورنر پنجاب نے کہا کہ وہ وزیراعظم شہباز شریف کے مشکور ہیں کہ جنہوں نے میرے ڈیمز بنانے سے متعلق بیان پر فوری ایکشن لیا۔گورنر پنجاب نے کہا کہ ریلیف کیمپ میں متاثرین سلاب کوروزانہ دو وقت کا کھانا دیا جائے گا۔انہوں نے کہا کہ ریڈکریسنٹ کو پنجاب میں متحرک کر دیا ہے کہ سیلاب متاثرہ علاقوں میں ریلیف کیمپس لگائیں۔

انہوں نے اس بات پر زور دیا کی حکومت کے ساتھ پوری قوم سیلاب متاثرین کی مدد کے لیے میدان میں نکلے۔ گورنر پنجاب نے مزید کہا کہ پاکستان موسمیاتی تبدیلوں سے بہت متاثر یوا ہے۔انہوں نے کہا کہ مستقبل میں اس صورتحال سے نمٹنے کے لیے پہلے پالیسی بنانے کی ضرورت ہے۔گورنر پنجاب نے کہا کہ دریاں کے کناروں پر آبادیوں کے قواعد و ضوابط اور پالیسیوں کو دوبارہ دیکھنے کی ضرورت ہے۔

انہوں نے کہا کہ جہاں کمزوریاں ہوں وہاں سزاو جزا کا نظام ہونا چاہئے۔اس موقع پر چیئرمین ریڈ کریسنٹ میاں حنیف نے کہا کہ گورنر پنجاب کی ہدایت پر پنجاب بھر میں سیلاب متاثرین کی مدد کے لیے ریلیف کیمپس لگا رہے ہیں۔انہوں نے کہا کہ پاکستان ہلالِ احمر پنجاب مختلف اضلاع بشمول لاہور، حافظ آباد، بونیر، قصور، مظفرگڑھ، راجن پور، نارووال اور منڈی بہاالدین میں ریلیف سرگرمیوں میں مصروفِ عمل ہے۔