Live Updates

پاکستان کیخلاف آبی دہشتگردی کا منصوبہ، سابق بھارتی جنرل کی ویڈیو سامنے آگئی

پیر 1 ستمبر 2025 21:35

نئی دہلی (اُردو پوائنٹ اخبارتازہ ترین - این این آئی۔ 01 ستمبر2025ء)بھارتی فوج کے سابق جنرل کی ایک ویڈیو سامنے آئی ہے جس میں وہ پاکستان کے خلاف آبی دہشت گردی کا منصوبہ بیان کر رہا ہے۔سوشل میڈیا پر سینئر اینکر حامد میر کی جانب سے ویڈیو شیئر کی گئی ہے جس میں بھارتی فوج کا ریٹائرڈ لیفٹیننٹ جنرل کنول جیت سنگھ ڈھلوں پانی کو بطور ہتھیار استعمال کرکے پاکستان کو تباہ کرنیکا منصوبہ بتا رہا ہے۔

یہ ویڈیو پاکستان کے خلاف بھارتی آبی جارحیت کے عزائم کو ظاہر کرتی ہے۔انٹرویو میں ریٹائرڈ لیفٹیننٹ جنرل کنول جیت سنگھ ڈھلوں نے پاکستان کے خلاف آبی دہشت گردی کا منصوبہ بتاتے ہوئے کہا کہ ہمارے پاس پانی روکنیکی جتنی صلاحیت ہے وہ ہم روکیں گے اور ایک دن رات کو اچانک پانی پاکستان کی جانب چھوڑ دیں گے اور ایک حد سے زیادہ پاکستان کے پاس پانی روکنے اور جمع کرنے کی صلاحیت نہیں جس سے وہاں سیلاب آئے گا اور پاکستان اس پانی کا ٹھیک استعمال بھی نہیں کرسکے گا۔

(جاری ہے)

کنول جیت سنگھ ڈھلوں کا کہنا تھا کہ اسی طرح ہم دوبارہ پانی کو روک لیں گے، خاص طور پر گرمیوں میں جب فصلوں کو پانی کی ضرورت ہوتی ہے اس وقت پانی روک لیں گے اور بارشوں کے موسم میں جب پانی کی ضرورت نہیں اس وقت پانی چھوڑدیں گے، اس طرح پانی کو ہم ہتھیار کے طور پر استعمال کرسکیں گے۔ایک سوال کے جواب میں کنول جیت سنگھ ڈھلوں نے ہرزہ سرائی کرتے ہوئے کہا کہ سندھ طاس معاہدہ پاکستان اور بھارت کے درمیان دو طرفہ معاہدہ ہے، یہ عالمی معاہدہ نہیں، ہم اپنی مرضی سے پانی روکیں گے اور مرضی سے چھوڑیں گے۔