اسلام آباد (اُردو پوائنٹ اخبارتازہ ترین - اے پی پی۔ 06 ستمبر2025ء) کل جماعتی حریت کانفرنس نے یوم دفاع پاکستان (6 ستمبر) کے موقع پر ایک شاندار اور پر وقار تقریب کا انعقاد کیا۔ تقریب کی صدارت حریت کانفرنس کے سنیئر رہنما محمد فاروق رحمانی نے کی جبکہ معروف عسکری تجزیہ نگار جنرل جاوید اسلم طاہر (ریٹائرڈ) نے بطور مہمانِ خصوصی شرکت کی۔یہاں جاری بیان کے مطابق تقریب کے دوران ریٹائرڈ جنرل زاہد محمود نے 6 ستمبر 1965ء کے شہداء اور غازیان پاک افواج اور شہداۓ کشمیر کو زبردست الفاظ میں خراجِ عقیدت پیش کیا۔
انہوں نے کہا کہ جب بزدل دشمن نے رات کی تاریکی میں پاکستان پر حملہ کرنے کی کوشش کی تو پاک افواج اور عوام نے ایک سیسہ پلائی ہوئی دیوار کی مانند دشمن کے عزائم کو ناکام بنا دیا۔
(جاری ہے)
پاکستان کے بہادر جوانوں نے اپنی جانوں کا نذرانہ پیش کر کے دشمن کو وہ تاریخی اور دندان شکن جواب دیا جو آج بھی عسکری تاریخ کے سنہری باب کے طور پر یاد کیا جاتا ہے۔
ریٹائرڈ جنرل زاہد محمود نے کہا کہ 6 ستمبر محض ایک دن نہیں بلکہ یہ قومی غیرت، بہادری اور ایثار کی علامت ہے۔ یہ دن ہمیں یاد دلاتا ہے کہ جب دشمن کی توپوں اور ٹینکوں نے لاہور پر یلغار کی تو پاکستانی قوم اور اس کی مسلح افواج نے اتحاد و ایمان کے ساتھ دشمن کو نہ صرف پسپا کیا بلکہ اسے ناقابلِ فراموش شکست سے دوچار کیا۔انہوں نے مذید اپنے خطاب میں کہا کہ کشمیر پاکستان کی شہ رگ اور ہماری قومی سلامتی کا بنیادی مسئلہ ہے۔
اگر ہمیں بھارت سے کسی محاذ پر لڑنا ہے تو وہ صرف اور صرف کشمیر پر ہے، کیونکہ یہ ہماری تکمیلِ پاکستان کا لازمی حصہ ہے۔انہوں نے کہا کہ بھارت آج بھی بلوچستان اور خیبرپختونخوا میں دہشت گردی کی کھلم کھلا پشتبانی کر رہا ہے، تاکہ پاکستان کو اندر سے کمزور کیا جا سکے۔ لیکن ہمیں یہ نہیں بھولنا چاہیے کہ ہم کشمیر کے شہداء، افواجِ پاکستان کے غازیوں اور اپنے عوام کی عظیم قربانیوں کے مقروض ہیں۔
ان کا کہنا تھا کہ ایک دن یہ شہداء ہم سے سوال کریں گے کہ ہم نے ان کی قربانیوں کی حفاظت کس طرح کی۔ لہٰذا یہ ہماری ذمہ داری ہے کہ ہم اپنی صفوں میں اتحاد پیدا کریں، دشمن کی سازشوں کو ناکام بنائیں اور کشمیر کی آزادی تک اپنی جدوجہد کو جاری رکھیں ۔ مہمانِ خصوصی ریٹائرڈ جنرل جاوید اسلم طاہر نے اپنے خطاب میں کہا کہ 1965ء کی جنگ نے یہ ثابت کر دیا کہ پاکستان کی افواج اور عوام ہر حال میں اپنے وطن کا دفاع کرنے کی صلاحیت رکھتے ہیں۔
انہوں نے کہا کہ پاکستان اور کشمیر ایک دوسرے کے لیے لازم و ملزوم ہیں اور کشمیر پاکستان کی شہ رگ ہے۔ انہوں نے کہا کہ 65 کی جنگ میں جو ہمیں کامیابی ملی وہ افواج پاکستان اور عوام کی یکجہتی اور اتحاد سے ممکن ہوا۔ انہوں نے کہا کہ کشمیر بنے گا پاکستان نعرہ لگانا چھوڑ دے بلکہ یہ کہے کہ کشمیر پاکستان ہے۔ اور ہم نے کسی بھی صورت کشمیر کو لینا ہے ۔
کشمیر پاکستان کا حصہ ہے۔اس موقع پر صدر تقریب محمد فاروق رحمانی نے اپنے صدارتی خطاب میں مہمانوں اور میڈیا کا شکریہ ادا کرتے ہوئے کہا کہ کشمیری عوام ہمیشہ سے پاکستان کی بقا، سلامتی اور دفاع کے ساتھ جڑے ہوئے ہیں۔ کشمیری عوام کے دل پاکستان کے ساتھ دھڑکتے ہیں اور وہ شہداء پاکستان کو اپنے شہداء تصور کرتے ہیں۔ انہوں نے کہا کہ جس طرح افواجِ پاکستان نے وطن عزیز کا دفاع کیا، اسی طرح کشمیری عوام بھی اپنے حقِ خودارادیت کے لیے بے مثال قربانیاں دے رہے ہیں۔
برگیڈیئر رؤف نے اپنے خطاب کے دوران آزاد کشمیر کی ماؤں بہنوں کو زبردست خراج عقیدت پیش کیا ۔انہوں نے کہا کہ آزاد کشمیر کی خواتین نے بہت قربانیاں دی ہیں۔ اس نے کہا کہ آزاد کشمیر میں شہداۓ کی یادگار بنائی جائے، آخر میں مقررین نے شہداء پاکستان، شہداء کشمیر اور عالمِ اسلام کے تمام شہداء کے بلند درجات کے لیے خصوصی دعا کی اور اس عہد کا اعادہ کیا کہ حریت کانفرنس ہر محاذ پر کشمیری عوام کی جدوجہد کو پاکستان کے ساتھ ہم آہنگ کر کے جاری رکھے گی۔
تقریب میں میں،ریٹائرڈ میجر جنرل زاہد محمود ،ریٹائرڈ برگیڈئر الطاف حسین،ریٹائرڈ برگیڈیئر سردار سجاد حسین ، ریٹائرڈ برگیڈیئر رؤف، ریٹائرڈ برگیڈیئر زرین ، ریٹائرڈ کرنل فاروق، ریٹائرڈ کرنل امتیاز،ریٹائرڈ میجر جمیل ، سنیر حریت رہنما محمود احمد ساغر ،یوسف نسیم،میر طاہر مسعود ، سید فیض نقشبندی ،جنرل سکریٹری ایڈوکیٹ پرویز احمد ،خطیب حسین،میڈم شمیم شال ،شیخ عبدالمتین ، شیخ یعقوب ، جاوید اقبال بٹ ،حاجی محمد سلطان ، نثار مرزا، داؤد خان،راجہ شاہین،اعجاز رحمانی ،امتیاز وانی،میاں مظفر، عبد المجید لون، محمد شفیع ڈار ، محمد اشرف ڈار ،سید گلشن،منظور احمد ڈار، شیخ عبد الماجد ،منظور احمد شاہ،عدیل مشتاق، زاہد مجتبیٰ ،نذیر احمد،خورشید میر، کرناہی ،شوکت حسین بٹ، رئیس میر ، خالد شبیر، امتیاز بٹ ، عبد الرشید بٹ ، غلام نبی بٹ چیرمین جموں و کشمیر کمینیٹی،قاضی عمران ،سکریٹری اطلاعات مشتاق احمد بٹ اور دیگر نے شرکت کی۔
