Live Updates

گورنر پنجاب سردار سلیم حیدر خان سے فلپائن کے سفیر ڈاکٹر ایمانوئل آر فرنینڈز کی ملاقات

فلپائنی سفیر نے پاکستان میں حالیہ سیلاب سے ہونے والے جانی و مالی نقصان پر دلی تعزیت کا اظہار بھی کیا

پیر 8 ستمبر 2025 20:20

۵لاہور (اُردو پوائنٹ اخبارتازہ ترین - آن لائن۔ 08 ستمبر2025ء) گورنر پنجاب سردار سلیم حیدر خان سے فلپائن کے سفیر ڈاکٹر ایمانوئل آر فرنینڈز نے گورنر ہاؤس لاہور میں ملاقات کی۔ ملاقات میں سفیر کی اہلیہ ایلیسیا کاول اور فلپائن کے اعزازی قونصل جنرل فہدیل شیخ بھی موجود تھے۔ دونوں فریقوں نے تعلیم، تجارت، ثقافت اور مشترکہ دلچسپی کے دیگر اہم شعبوں میں تعاون کے مواقع تلاش کئے۔

فلپائنی سفیر نے پاکستان میں حالیہ سیلاب سے ہونے والے جانی و مالی نقصان پر دلی تعزیت کا اظہار بھی کیا۔ اس موقع پر گورنر پنجاب سردار سلیم حیدر خان نے کہا کہ فلپائن کا پاکستان کے ساتھ دیرینہ دوستی کا رشتہ ہے۔ انہوں نے کہا کہ موسمیاتی تبدیلیوں میں پاکستان کی بہت کم شراکت کے باوجود پاکستان کو موسمیاتی تبدیلیوں کی وجہ سے بدترین سیلابوں اور مسائل کا سامنا ہے۔

(جاری ہے)

گورنر پنجاب نے کہا کہ فلپائن اور پاکستان موسمیاتی تبدیلی کے چیلنج سے نمٹنے کے لیے ایک دوسرے کے ساتھ تعاون کر سکتے ہیں۔ انہوں نے کہا کہ بطور چانسلر انہوں نے یونیورسٹیوں میں موسمیاتی چیلنج پر پروگرام شروع کیے ہیں۔ گورنر پنجاب نے کہا کہ پاکستان کی ٹیکسٹائل مصنوعات اپنے اعلیٰ معیار کی وجہ سے پوری دنیا میں مشہور ہیں۔ ان کا مزید کہنا تھا کہ پیپلز پارٹی نے صوبہ سندھ میں سیلاب متاثرین کی بحالی کا سب سے بڑا پروگرام شروع کیا ہے۔

گورنر پنجاب نے کہا کہ چیئرمین پاکستان پیپلز پارٹی بلاول بھٹو نے 2021 سے اب تک صوبہ سندھ میں سیلاب متاثرین کے لیے 21 لاکھ گھر تعمیر کیے ہیں۔ فلپائن کے سفیر ڈاکٹر ایمینوئل آر فرنینڈز نے گورنر پنجاب کو گفٹ یونیورسٹی میں طلباء کے تبادلے اور سکالرشپ پروگرام کے لیے گروتھ ونڈو کے قیام کے بارے میں آگاہ کیا۔ انہوں نے کہا کہ وہ پاکستان اور فلپائن کے درمیان تعلیمی، تجارتی اور ثقافتی وفود کے تبادلوں کو یقینی بنائیں گی