کراچی کی ابتر صورتحال سندھ حکومت، بلدیاتی نمائندوں اور متعلقہ اداروں کی نااہلی کا ثبوت ہے‘چیئرمین ایم کیوایم

کراچی کو غیر مقامی سندھ حکومت، بلدیاتی نمائندوں اور سرکاری افسران نے نقصان پہنچایا ہے، خالد مقبول صدیقی

بدھ 10 ستمبر 2025 12:23

کراچی(اُردو پوائنٹ اخبارتازہ ترین - این این آئی۔ 10 ستمبر2025ء)متحدہ قومی موومنٹ پاکستان کے چیئرمین خالد مقبول صدیقی نے کہا ہے کہ کراچی کو غیر مقامی سندھ حکومت، بلدیاتی نمائندوں اور سرکاری افسران نے نقصان پہنچایا ہے۔اپنے ایک بیان میں خالد مقبول صدیقی نے کہا کہ کراچی کی ابتر صورتحال سندھ حکومت، بلدیاتی نمائندوں اور متعلقہ اداروں کی نااہلی کا ثبوت ہے۔

لیاری اور ملیرندی کا پانی رہائشی علاقوں میں داخل ہونے سے جانی و مالی نقصان کا خدشہ ہے۔

(جاری ہے)

خالد مقبول صدیقی نے کہا کہ کراچی کی ندی نالوں کے اطراف غیر قانونی گوٹھ اور تجاوزات کی ذمہ دار بھی سندھ حکومت ہے، بارش کی پیشگوئی کے باوجود انتظامات نہ کرنا سندھ حکومت اور بلدیاتی نمائندوں کی غفلت ہے۔انہوں نے کہا کہ سندھ حکومت نے کراچی واٹر اینڈ سیوریج کارپوریشن پر قبضہ کر کے اسے تباہ کردیا ہے۔

ناگن چورنگی، قیوم آباد، ایم نائن، نارتھ کراچی، ملیر اور گڈاپ سمیت کئی علاقے زیرِ آب ہیں۔خالد مقبول صدیقی نے کہا ہے کہ اربوں روپے سے بننے والی شاہراہ بھٹو کا بارش میں بہہ جانا پی پی کی کرپشن کی مثال ہے، ایم کیو ایم کے اراکین اسمبلی اور کارکنان کو متاثرہ علاقوں میں امدادی کارروائیاں تیز کرنے کی ہدایت کی ہے۔