Live Updates

بیرسٹرگوہر کی اڈیالہ جیل کے باہر پیش آئے واقعہ پر صحافی طیب بلوچ سے معذرت

تحریک انصاف بطور سیاسی جماعت تشدد پر یقین نہیں رکھتی جو ہوا وہ افسوناک تھا؛ چیئرمین پی ٹی آئی کی گفتگو

ساجد علی بدھ 10 ستمبر 2025 13:34

بیرسٹرگوہر کی اڈیالہ جیل کے باہر پیش آئے واقعہ پر صحافی طیب بلوچ سے ..

راولپنڈی ( اُردو پوائنٹ اخبارتازہ ترین۔ 10 ستمبر 2025ء ) پاکستان تحریک انصاف کے چیئرمین بیرسٹر گوہر نے اڈیالہ جیل کے باہر پیش آئے واقعہ پر صحافی طیب بلوچ سے معذرت کرلی۔ تفصیلات کے مطابق میڈیا سے گفتگو کے دوران صحافی طیب بلوچ نے بیرسٹر گوہر سے مکالمہ کرتے ہوئے کہا کہ مجھے سنگین نتائج کی دھمکیاں دی جا رہی تھیں، میں علیمہ آپا کے پاس جا رہا تھا کہ آپ کوئی کمنٹ کر دیں گی تو میری جان خلاصی ہو جائے گی، میں نے اگر علیمہ آپا سے کوئی بدتمیزی کی یا گالیاں دیں تو وہ ریکارڈ ہوتیں۔

جس پر چئیرمین پی ٹی آئی بیرسٹر گوہر علی خان نے صحافی طیب بلوچ کو گلے لگا لیا اور ان کا ہاتھ پکڑ کر یقین دہانی کرائی کہ آج کے بعد ایسا نہیں ہوگا کیوں کہ تحریک انصاف تشدد پر یقین نہیں رکھتی، سوال جتنا بھی ٹیڑھا ہو اس پر تشدد جیسا واقعہ نہیں ہونا چاہیئے، جو بھی واقعہ ہوا مجھے اُس پر افسوس ہے اور میں معذرت خواہ ہوں۔

(جاری ہے)

یاد رہے کہ پاکستان تحریک انصاف کے بانی چیئرمین اور سابق وزیراعظم عمران خان کی ہمشیرہ علیمہ خان کی میڈیا سے گفتگو کے دوران بدنظمی کا واقعہ پیش آیا تھا، راولپنڈی کی اڈیالہ جیل کے باہر علیمہ خان کی میڈیا سے گفتگو کے دوران پی ٹی آئی کارکنوں، وکلاء اور صحافیوں کے درمیان تلخ کلامی ہوئی جس کے بعد صورتحال بگڑگئی اور دھکم پیل، گالم گلوچ و ایک دوسرے پر تشدد میں بدل گئی تھی۔

عینی شاہدین سے معلوم ہوا تھا کہ اڈیالہ کے باہر جیسے ہی علیمہ خان نے پریس کانفرنس شروع کی تو صحافی طیب بلوچ نے بولنا شروع کردیا اور کہنے لگے کہ میرے خلاف سوشل میڈیا پر ٹرولنگ ہورہی ہے، اس پر ان کی نعیم حیدر پنجوتھہ کے ساتھ تکرار ہوئی اور معاملہ لڑائی تک پہنچ گیا، اس دوران پی ٹی آئی کارکنوں، وکلاء اور صحافیوں کی جانب سے ایک دوسرے کے ساتھ بدتمیزی کی گئی جہاں چند صحافیوں کو دھکے بھی دیئے گئے، اس ناخوشگوار واقعے کے بعد صحافیوں نے احتجاج کرتے ہوئے علیمہ خان کی میڈیا سے گفتگو کا بائیکاٹ کردیا۔

بعض عینی شاہدین کی جانب سے یہ بھی کہا گیا تھا کہ صحافی طیب بلوچ کی جانب سے عمران خان کی ہمشیرہ علیمہ خان کو مبینہ طور پر گالی دی گئی، جس کی وجہ سے کارکن مشتعل ہوئے اور صورتحال اس نوبت تک پہنچی اور وہاں موجود دیگر صحافی طیب بلوچ کو نکال کر پریس کانفرنس سے لے گئے، اس سارے معاملے میں علیمہ خان اور نورین نیازی بیچ بچاؤ کرانے کی کوشش کرتی رہیں۔