وفاقی وزیرداخلہ محسن نقوی ، وزیر ریلویز حنیف عباسی کی زیر صدارت اہم اجلاس ، اسلام آباد، راولپنڈی کے درمیان تیز رفتار ریل سروس شروع کرنے کا فیصلہ

پیر 15 ستمبر 2025 13:16

اسلام آباد (اُردو پوائنٹ اخبارتازہ ترین - اے پی پی۔ 15 ستمبر2025ء) جڑواں شہروں کے درمیان عوام کو جدید اور تیز رفتار سفری سہولت فراہم کرنے کے لیے اسلام آباد اور راولپنڈی کے درمیان ریل سروس شروع کرنے کا فیصلہ کیا گیا ہے جس کا آغاز مارگلہ ریلوے اسٹیشن اسلام آباد سے راولپنڈی صدر اسٹیشن تک ہوگا۔ اس منصوبے کے تحت شہری صرف 20 منٹ میں دونوں شہروں کے درمیان سفر طے کر سکیں گے، جس سے وقت اور ایندھن کی نمایاں بچت ہوگی اور شاہراہوں پر ٹریفک کے دباؤ میں بھی کمی آئے گی۔

وفاقی وزیر داخلہ محسن نقوی اور وزیر ریلویز حنیف عباسی کی زیر صدارت اہم اجلاس میں منصوبے پر فوری پیش رفت کا فیصلہ کیا گیا۔ اجلاس میں وزیر مملکت برائے داخلہ طلال چوہدری سمیت اعلیٰ حکام نے شرکت کی۔اجلاس میں اس بات پر اتفاق کیا گیا کہ ریل سروس کا آغاز مارگلہ ریلوے اسٹیشن اسلام آباد سے راولپنڈی صدر اسٹیشن تک کیا جائے گا۔

(جاری ہے)

منصوبے کے فریم ورک ایگریمنٹ کو آئندہ ہفتے حتمی شکل دے کر اس پر دستخط کیے جائیں گے۔

فیصلے کے مطابق منصوبے کے لیے ٹریک پاکستان ریلوے فراہم کرے گی جبکہ ریل سروس کا انتظام کپیٹل ڈویلپمنٹ اتھارٹی (سی ڈی اے) کے پاس ہوگا۔ اجلاس میں ریل سروس کے لیے جدید ٹرین درآمد کرنے پر بھی اتفاق کیا گیا۔وزیر ریلویز حنیف عباسی نے کہا کہ یہ منصوبہ جڑواں شہروں کے عوام کے لیے انقلابی سہولت ہوگا، جس کے ذریعے شہری تیز، محفوظ اور کم وقت میں سفر کر سکیں گے۔

وزیر داخلہ محسن نقوی نے کہا کہ یہ منصوبہ وزیراعظم محمد شہباز شریف کے عوامی ریلیف کے وژن کا عکاس ہے، جس کی تکمیل سے ہزاروں شہریوں کو معیاری اور سستی سفری سہولت میسر آئے گی۔وزیر مملکت طلال چوہدری نے کہا کہ ٹرین سروس شہریوں کے لیے کم خرچ اور تیز رفتار سفری سہولت ہوگی اور اس سے سڑکوں پر ٹریفک کا دباؤ بھی کم ہوگا۔اجلاس میں وفاقی سیکرٹری داخلہ، سیکرٹری ریلویز، چیئرمین سی ڈی اے، کمشنر راولپنڈی، کمانڈنٹ و ڈپٹی کمانڈنٹ ایف سی، آئی جی اسلام آباد پولیس، ڈپٹی کمشنر اسلام آباد اور دیگر اعلیٰ حکام نے بھی شرکت کی۔\932