وزیر اعلی سندھ کی زیر صدارت گھوٹکی کندھ کوٹ پل منصوبے کی پیش رفت کے حوالے سے اعلی سطحی اجلاس

کراچی (اُردو پوائنٹ اخبارتازہ ترین - اے پی پی۔ 18 ستمبر2025ء) وزیر اعلی سندھ سید مراد علی شاہ نے دریائے سندھ پر گھوٹکی کندھ کوٹ پل منصوبے کی پیش رفت کے حوالے سے اعلی سطح کے اجلاس کی صدارت کرتے ہوئے سیلاب اور دیگر مسائل کے باعث معطل ہونے والے کام کو دوبارہ شروع کرنے کے احکامات دے دئیے۔جمعرات کو وزیراعلی ہائوس سے جاری اعلامیہ کے مطابق انہوں نے کہا کہ میں نومبر میں ذاتی طور پر پل کے مقام کا دورہ کروں گا۔

وزیراعلی ہائوس میں منعقد ہ اجلاس میں صوبائی وزرا ضیا الحسن لنجار اور حاجی علی حسن زرداری، وزیر اعلی کے معاون خصوصی سید قاسم نوید، چیف سیکریٹری آصف حیدر شاہ، انسپکٹر جنرل پولیس غلام نبی میمن، سیکریٹری داخلہ اقبال میمن، وزیر اعلی کے پرنسپل سیکریٹری آغا واصف، سیکریٹری ورکس نواز سوہو، سیکریٹری ٹرانسپورٹ اسد ضامن اور دیگر اعلی حکام نے شرکت کی۔

(جاری ہے)

وزیراعلی سندھ نے بتایا کہ گھوٹکی کندھ کوٹ پل دریائے سندھ پر سب سے طویل پل ہوگا جس کی لمبائی 12.15 کلومیٹر ہوگی۔ گھوٹکی کی جانب 10.40کلومیٹر اور کندھکوٹ کی جانب 8.10کلومیٹر طویل رسائی سڑکیں ہوں گی جبکہ 4.548کلومیٹر طویل ٹھل لنک روڈ بھی منصوبے کا حصہ ہے۔محکمہ ورکس نے بریفنگ میں بتایا کہ گھوٹکی اور کندھکوٹ کی رسائی سڑکیں اور ٹھل لنک روڈ مکمل ہوچکے ہیں، جری واہ، گھوٹا فیڈر کینال اور ٹبی مائنر پر تین پل بھی تعمیر ہوچکے ہیں۔

پل کے 38 پائپ کلورٹس مکمل ہوچکے ہیں جبکہ 732 میں سے 379 پائلز تعمیر ہوچکے ہیں تاہم دریائے سندھ میں شدید سیلابی صورتحال کے باعث کام فی الحال معطل ہے۔سیدمراد علی شاہ نے محکمہ ورکس کو ہدایت دی کہ نومبر میں جب سیلابی پانی کم ہو تو تعمیراتی کام مکمل رفتار سے دوبارہ شروع کیا جائے۔ انہوں نے وزیر داخلہ کو بھی ہدایت دی کہ نومبر سے پل کی سائٹ پر سخت سیکورٹی کو یقینی بنایا جائے۔انہوں نے کہا کہ یہ پل صرف ایک انجینئرنگ کا کارنامہ نہیں بلکہ پاکستان کی معیشت، علاقائی روابط اور عوامی سہولت کے لیے ایک نمایاں منصوبہ ہوگا۔وزیر اعلی سندھ نے کہاکہ یہ پل سندھ، پنجاب اور بلوچستان کو آپس میں جوڑے گا اور خطے میں تجارت، ٹرانسپورٹ اور سماجی و معاشی سرگرمیوں کو فروغ دے گا۔