Live Updates

حکومت کے ساتھ ساتھ مخیرحضرات سیلاب متاثرین کی امداد اور بحالی میں بھرپور حصہ لیں،گورنر پنجاب

پیر 22 ستمبر 2025 21:20

لاہور (اُردو پوائنٹ اخبارتازہ ترین - اے پی پی۔ 22 ستمبر2025ء) گورنر پنجاب سردار سلیم حیدر خان نے چنیوٹ، مظفرگڑھ اور قصور کے سیلاب متاثرین میں امدادی سامان تقسیم کرنے کی تقریب میں بطور مہمان خصوصی شرکت کی۔ تقریب میں صدر پاکستان پیپلز پارٹی سنٹرل پنجاب و سابق وزیراعظم راجہ پرویز اشرف اور سینئر رہنما فیصل میر سمیت دیگر بھی موجود تھے۔اس موقع پر تقریب سے خطاب کرتے ہوئے گورنرپنجاب سردار سلیم حیدر خان نے کہا کہ پاکستان پیپلز پارٹی عام آدمی کی جماعت ہے اور سیلاب متاثرین کا دکھ درداچھی طرح سمجھتی ہے۔

انہوں نے کہا کہ چیئرمین بلاول بھٹو زرداری نے اپنی سالگرہ دھوم دھڑکے سے منانے کی بجائے سیلاب زدگان کی مدد کرکے سب کے دل جیت لیے ہیں۔ گورنر پنجاب نے کہا کہ چیئر مین بلاول بھٹو کی جانب سے یہ ایک انقلابی قدم ہے جو قابل ستائش ہے۔

(جاری ہے)

انہوں نے کہا کہ جہلم، چکوال، مظفرگڑھ، علی پور اور جلالپور کے علاقوں کے دوروں کے دوران سیلاب زدگان کو دیکھ کر بہت دکھ ہوا۔

گورنر پنجاب نے کہا کہ پاکستان پیپلز پارٹی کے سینئر رہنما فیصل میر نے سیلاب زدگان کے لیے ہر گھر کا مکمل پیکیج فراہم کیا ہے جس میں ایک ماہ کا راشن، چار عدد چارپائیاں، ایک عدد سائیکل، صندوق اور بستروں کے علاوہ گھر کے ایک یونٹ کا مکمل سامان شامل ہے۔انہوں نے کہا کہ مخیر حضرات سے بھی اپیل ہے کہ آگے بڑھ کر متاثرین کی امدداد اور بحالی میں بھر پور حصہ لیں۔گورنر پنجاب نے کہا کہ میں خصوصی طور پر پنجاب ریڈ کریسنٹ اور سویٹ ہوم کا شکریہ ادا کرتا ہوں جنہوں نے میرے کہنے پر سیلاب زدگان کی ہر ممکن مدد کی۔