گلوبل صمود فلوٹیلا پر ڈرون حملہ، سابق سینیٹر مشتاق احمد نے ویڈیو جاری کردی

بدھ 24 ستمبر 2025 17:52

تونس سٹی (اُردو پوائنٹ اخبارتازہ ترین - این این آئی۔ 24 ستمبر2025ء)اسرائیل کا محاصرہ توڑ کر غزہ جانے کے لیے بین الاقوامی آبی راستے میں موجود گلوبل صمود فلوٹیلا میں شامل کشتی پر ڈرون حملے کی ویڈیو سامنے آگئی۔درجنوں کشتیوں پر موجود گلوبل صمود فلوٹیلا غزہ کی جانب روانہ ہے اور اس وقت صمود فلوٹیلا یونان کے ساحل پر بین الاقوامی آبی راستے سے گزر رہا ہے جس میں پاکستان کے ایوان بالا سینیٹ کے سابق رکن مشتاق احمد سمیت سیکڑوں افراد موجود ہیں۔

سابق سینیٹر مشتاق احمد کی جانب سے سوشل میڈیا پر ڈالی گئی پوسٹ میں بتایا گیا ہے کہ رات کے وقت غزہ کے لیے جانے والے پرامن گلوبل صمود فلوٹیلا پر 10 ڈرونز حملے کیے گئے، بارودی مواد اور آگ کے گولے پھینکے گئے لیکن ہمارا عزم پختہ اور حوصلے بلند ہیں، ہم ان شا اللہ غزہ پہنچ کر رہیں گے۔

(جاری ہے)

سابق سینیٹر مشتاق احمد نے کہا کہ گلوبل صمود فلوٹیلا پر اسرائیلی نسل پرست ناجائز ریاست کے ڈرون حملوں کا بین الاقوامی برادری نوٹس لے اور حکومت پاکستان اس مسئلے کو عالمی فورمز پر اٹھائے۔

انہوں نے بتایا کہ ناجائز اسرائیلی ریاست کی جانب سے ایسا خطرناک کیمیکل پھینکا گیا جسے سونگھنے اور چھونے سے بہت نقصان ہوتا ہے، یہ سب گلوبل صمود فلوٹیلا کو ڈرانے اور غزہ جانے سے روکنے کے لیے روکنے کی نفسیاتی جنگ ہے لیکن ہم رکیں گے نہیں۔انہوں نے کہا کہ ہم غزہ کا محاصرہ ختم کریں گے اور وہاں انسانی ہمدردی کی بنیاد پر امداد پہنچائیں گے، ایک چھوٹی سی ریاست نے اپنی دہشت گردی اور بدمعاشی سے پوری دنیا کو یرغمال بنایا ہوا ہے اس لیے میری تمام لوگوں سے اپیل ہے کہ آپ لوگ بھی باہر نکلیں اور اس ناجائز صیہونی ریاست کے خلاف ہر جگہ آواز اٹھائیں۔

سابق سینیٹر نے وزیراعظم شہباز شریف کو مخاطب کرتے ہوئے کہا کہ اس معاملے کو اقوام متحدہ اور او آئی سمیت سمیت ہر بین الاقوامی فورم پر اٹھائیں، کیونکہ جو کام ہر کرنے جا رہے ہیں یہ او آئی سی کے منشور میں شامل ہے اور انہیں کرنا چاہیے تھا لیکن یہ کام گلوبل صمود فلوٹیلا کرنے جا رہا ہے۔مشتاق احمد نے سوشل میڈیا پر رات کو گلوبل صمود فلوٹیلا کی کشتی پر ہونے والے حملے کی ویڈیو بھی شیئر کی۔