Live Updates

ضمنی بلدیاتی انتخابات میں پیپلز پارٹی کی شاندار کامیابی، عوام کا جمہوریت پر اعتماد قابلِ تحسین ہے‘ بلاول بھٹو زرداری

جمعرات 25 ستمبر 2025 23:16

کراچی (اُردو پوائنٹ اخبارتازہ ترین - آن لائن۔ 25 ستمبر2025ء) پاکستان پیپلز پارٹی کے چیئرمین بلاول بھٹو زرداری نے سندھ بھر میں ضمنی بلدیاتی انتخابات میں پارٹی کی نمایاں کامیابی پر عوام کا دل سے شکریہ ادا کرتے ہوئے اسے جمہوریت، ترقی اور عوامی خدمت کے وڑن کی توثیق قرار دیا ہے۔ انہوں نے کامیاب امیدواروں کو مبارکباد اور پارٹی کارکنان کو ان کی انتھک محنت پر زبردست خراجِ تحسین پیش کیا۔

سندھ میں ہونے والے ضمنی بلدیاتی انتخابات میں پارٹی کی کامیابی پر اپنے بیان میں انہوں نے کہا کراچی سے کشمور تک، عوام نے ایک بار پھر پیپلز پارٹی پر غیر متزلزل اعتماد کا اظہار کر کے یہ ثابت کر دیا ہے کہ شہید ذوالفقار علی بھٹو اور محترمہ بینظیر بھٹو شہید کی جماعت آج بھی عوام کے دلوں کی ترجمان ہے۔

(جاری ہے)

انہوں نے کہا کہ ضمنی بلدیاتی انتخابات میں عوامی حمایت اس بات کا ثبوت ہے کہ عوام کا رشتہ پیپلز پارٹی کے ساتھ گہرا اور تاریخی ہے، اور یہ کامیابی ہمارے لیے مزید عوامی خدمت کے جذبے کو مضبوط کرتی ہے۔

بلاول بھٹو نے نومنتخب نمائندوں کو مبارکباد دیتے ہوئے کہا کہ وہ عوامی مسائل کے حل، مقامی ترقی، اور اختیارات کی نچلی سطح تک منتقلی کو یقینی بنانے میں بھرپور کردار ادا کریں گے۔ان کا کہنا تھا ہم بلدیاتی اداروں کے استحکام اور ہر محلے، ہر گاؤں اور ہر شہر کی ترقی کے لیے اپنی جدوجہد جاری رکھیں گے، کیونکہ ایک مستحکم بلدیاتی نظام ہی پائیدار ترقی اور وسائل کی منصفانہ تقسیم کا ضامن ہے۔

بلاول بھٹو زرداری نے دیگر صوبوں، بالخصوص پنجاب، کا حوالہ دیتے ہوئے کہا کہ وہاں کے عوام طویل عرصے سے بلدیاتی نظام کے ثمرات سے محروم ہیں۔آج اگر پنجاب میں فعال بلدیاتی ادارے موجود ہوتے تو سیلاب متاثرین کی امداد میں رکاوٹیں نہ آتیں۔انہوں نے مزید کہا کہ پیپلز پارٹی کو دیا گیا ہر ووٹ دراصل جمہوریت اور عام آدمی کے حقوق کے محافظ وڑن کی حمایت ہے، اور یہ ووٹ ایک ترقی پسند و خوشحال پاکستان کے لیے ڈالا گیا ووٹ ہے۔ انہوں نے کہا ہم ہم سب کو مل کر ایک ایسا پاکستان بنانا ہے جہاں جمہوریت پھلے پھولے، عوام خوشحال ہوں، اور ہر شہری عزت و وقار کے ساتھ زندگی گزارے۔