وزیراعلیٰ مریم نواز سے پاکستان میں تعینات آئرلینڈ کی پہلی ریزیڈنٹ سفیر میری او نیل کی ملاقات، تجارتی،تعلیمی ، ماحولیاتی شعبوں میں دوطرفہ تعاون بڑھانے پر اتفاق

لاہور (اُردو پوائنٹ اخبارتازہ ترین - اے پی پی۔ 26 ستمبر2025ء) وزیراعلیٰ پنجاب مریم نواز سے پاکستان میں تعینات آئرلینڈ کی پہلی ریزیڈنٹ سفیر میری او نیل نے ملاقات کی۔ وزیراعلی ٰ نے آئر لینڈ کی سفیر میری او نیل کا پر خلوص و پر تپاک خیر مقدم کیا۔ ملاقات میں پاک آئرلینڈ تعلقات کے فروغ،تجارتی مواقع،موسمیاتی تعاون،تعلیم، آئی ٹی اور عوامی روابط کے فروغ پر تفصیلی بات چیت کی گئی۔

اس موقع پر تجارتی،تعلیمی اور ماحولیاتی شعبوں میں دوطرفہ تعاون بڑھانے پر اتفاق کیا گیا۔ وزیراعلیٰ نے آئرلینڈ کو پنجاب میں سرمایہ کاری کی دعوت دی اور مکمل معاونت کی یقین دہانی کرائی۔ وزیراعلیٰ نے کہا کہ آئرلینڈ اصول پسندی اور ترقی کی علامت ہے، سفیر میری اونیل کی آمد تعلقات میں نئے باب کا آغاز ہے۔

(جاری ہے)

اسلام آباد میں آئرلینڈ کے پہلے سفارتخانے کا قیام تاریخی پیشرفت ہے۔

اسلام آباد میں آئرلینڈ کا سفارتخانہ پنجاب کیلئے آئرش اداروں، بزنس اورعوام سے نئی شراکت داری کا اہم ذریعہ ہوگا۔ انہوں نے کہا کہ آئرش سفارت خانے کا قیام پاکستان اور آئرلینڈ کے درمیان سیاسی، معاشی، ثقافتی اور تعلیمی تعاون کو نئی جہت دے گا۔ پاکستان اور آئرلینڈ امن، کثیرالجہتی تعاون اور رول بیسڈ انٹرنیشنل آرڈر کے حامی ہیں۔ پنجاب ماحولیاتی تبدیلی سے سب سے زیادہ متاثرہ خطہ ہے اور حالیہ تباہ کن سیلاب اس کی واضح مثال ہے۔

پنجاب اور آئر لینڈ کے مابین موسمیاتی رزیلینس،پائیدار زراعت، رینیوایبل انرجی اور گرین ٹرانزیشن میں تعاون ممکن ہے۔ انہوں نے کہا کہ پاک آئر لینڈ موجودہ دوطرفہ تجارت 213 ملین ڈالر، کئی گنا مزید بڑھائی جا سکتی ہے۔پنجاب آئر لینڈ کو زرعی ترقی،ڈیری فارمنگ، لائیو اسٹاک،آئی ٹی اور رینیوایبل انرجی میں شاندار مواقع فراہم کرسکتا ہے۔ پاکستان کی اسپیشل انویسٹمنٹ فسیلیٹیشن کونسل غیر ملکی سرمایہ کاروں کو خصوصی سہولتیں اور مراعات دے رہی ہے۔

2024 میں ڈبلن میں ٹی 20 سیریز اور رواں سال پاکستان ویمن کرکٹ ٹیم کے دورے نے عوامی روابط کو مزید گہرا کیا ہے۔وزیراعلیٰ نے کہا کہ پنجاب آئرلینڈ کو محض ایک سفارتی پارٹنر نہیں بلکہ ایک دوست کے طور پر دیکھتا ہے۔پاک آئر لینڈ تعلقات مستقبل میں سفارتکاری، تجارت،تعلیم، ثقافت اور عوامی روابط سے مزید مضبوط ہوں گے۔وزیر اعلیٰ نے آئرلینڈ میں مقیم پاکستانی کمیونٹی کی ہیلتھ سیکٹر اور دیگر سیکٹرز میں نمایاں خدمات کو سراہا۔