(ن) لیگ سے لفظی جنگ، پیپلز پارٹی کا وزیراعظم سے ملاقات کرکے معاملہ اٹھانے کا فیصلہ

وفاقی حکومت پیپلز پارٹی کے ووٹوں سے بنی ، عزت نہ ملی تو پیپلز پارٹی دوسرا آپشن سوچ سکتی ہے، ذرائع پیپلز پارٹی

منگل 30 ستمبر 2025 19:40

اسلام آباد (اُردو پوائنٹ اخبارتازہ ترین - این این آئی۔ 30 ستمبر2025ء) پیپلز پارٹی نے (ن) لیگ سے لفظی جنگ کا معاملہ وزیراعظم کے سامنے اٹھانے کا فیصلہ کیا ہے۔ذرائع پیپلز پارٹی کے مطابق لندن سے وزیراعظم شہباز شریف کی وطن واپسی پر پیپلز پارٹی کی قیادت ان سے ملاقات کر کے اپنے تحفظات سے آگاہ کرے گی، تخفظات دور نہ ہونے پر گورنر پنجاب سردار سلیم حیدر کو پنجاب کی اصل کارکردگی دکھانے کا ٹاسک ملنے کا امکان ہے۔

(جاری ہے)

ذرائع کے مطابق نائب وزیر اعظم اسحاق ڈار کی سربراہی میں پیپلز پارٹی ن لیگ کے تخفظات دور کرنے کیلئے قائم کمیٹی کی کارکردگی بے سود رہی ہے، پیپلز پارٹی وزیراعلیٰ پنجاب اور وزراء کے بینظیر انکم سپورٹ پروگرام میں رکاوٹوں پر مبنی بیان اورتنقید سامنے رکھے گی۔ذرائع پیپلز پارٹی نے کہا ہے کہ وفاقی حکومت پیپلز پارٹی کے ووٹوں سے بنی ہے، عزت نہ ملی تو پیپلز پارٹی دوسرا آپشن سوچ سکتی ہے۔