Live Updates

پاکستان کی ثالثی میں ایران امریکہ جنگ بندی انسانیت دشمنوں کیلئے ایک بڑادھچکا ہے، حریت کانفرنس

جمعرات 9 اپریل 2026 18:39

سری نگر (اُردو پوائنٹ اخبارتازہ ترین - اے پی پی۔ 09 اپریل2026ء) بھارت کے غیر قانونی زیر قبضہ جموں وکشمیر میں کل جماعتی حریت کانفرنس نے کہا ہے کہ بی جے پی کی بھارتی حکومت کیطرف سے علاقے میں کی جانے والی نئی مردم شماری کامقصد غیر کشمیریوں کو شامل کرکے آبادیاتی تناسب میں تبدیلی لانا ہے۔ مقبوضہ علاقے میں مردم شماری رواں برس مئی، جون میں دو مرحلوں میں ہو گی۔

کشمیر میڈیاسروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا کہ نئی مردم شماری میں ان بھارتی فوجیوں، پیرا ملٹری اہلکاروں، مزدوروں، تاجروں، ملازمین اور بیوروکریٹس کا اندراج کیا جائے گا جنہیں اگست 2019 کے بعد علاقے کے ڈومیسائل سرٹیفکیٹس جاری کیے گئے ہیں ۔

(جاری ہے)

انہوں نے کہا کہ بھارت نے پہلے ہی کشمیری عوام کو مقامی وسائل تک رسائی اور معاشی مواقع سمیت اپنے تمام بنیادی انسانی حقوق سے محروم کر رکھا ہے۔

ترجمان نے اقوام متحدہ پر زور دیا کہ وہ بھارت کو جموں وکشمیر کے متنازعہ خطے میں بین الاقوامی قوانین اور معاہدوں کی خلاف ورزیوں اور انسانیت کے خلاف سنگین جرائم پر جواب دہ ٹھہرائے اور تنازعہ کشمیر کو اپنی پاس کردہ قراردادوں کے مطابق حل کرانے کیلئے کردار ادا کرے۔کل جماعتی حریت کانفرنس کے سینئر رہنما آغا سید حسن الموسوی الصفوی نے پاکستان کی ثالثی میں ایران اور امریکہ کے درمیان جنگ بندی کو انسانیت دشمن قوتوں کے لیے ایک بڑا دھچکاقرار دیا۔

مسلم سٹوڈنٹس فیڈریشن کے صدر ڈاکٹر قمر الزمان زرگر نے بھی جنگ بندی کے حوالے سے پاکستان کی کوششوں کو سراہا اور مثبت نتائج کی امید ظاہر کی۔ بھارتی پولیس نے ضلع کٹھوعہ میں ایک شخص رومیلو سنگھ کو کالے قانون” پبلک سیفٹی ایکٹ “کے تحت گرفتار کرکے جموں جیل میں منتقل کردیا۔ پولیس نے شہری کی گرفتاری کا جواز فراہم کرنے کیلئے اس پر بھارت مخالف سرگرمیوں میں ملوث ہونے کا الزام عائد کیا ۔

ضلع گاندربل کے علاقے کنگن میں نہر سے ایک لاپتہ شخص کی لاش برآمد ہوئی ہے، جس سے علاقے میں مشتبہ حالات میں لاشوں کی بازیابی کے حوالے سے تشویش بڑھ گئی ہے۔ بھارتی فوجیوں نے چند روزہ قبل گاندربل ہی کے علاقے ارامہ میں ایک بےگناہ کشمیری نوجوان رشید احمد مغل کو جعلی مقابلے میں شہید کردیا تھا۔