Live Updates

امریکہ، ایران جنگ بندی کے حوالے سے پاکستان کی سفارتی کامیابی عالمی امن کیلئے بڑی پیش رفت ہے، حامد سعید کاظمی

جمعرات 9 اپریل 2026 18:44

لاہور (اُردو پوائنٹ اخبارتازہ ترین - اے پی پی۔ 09 اپریل2026ء) تنظیمات اہلسنت پاکستان کے سربراہ اور سابق وفاقی وزیر مذہبی امور صاحبزادہ سید حامد سعید کاظمی، پیر میاں عبدالخالق القادری، صاحبزادہ ڈاکٹر ابوالخیر محمد زبیر الوری، میاں جلیل احمد شرقپوری، انجینئر ثروت اعجاز قادری، پیرزادہ محمد امین قادری، محمد اکرم رضوی، سید احسان گیلانی اور دیگر رہنماوں نے امریکہ، ایران جنگ بندی کے حوالے سے پاکستان کی سفارتی کامیابی کو عالمی امن کیلئے بڑی پیش رفت قرار دیا ہے۔

اپنے ایک مشترکہ بیان میں انہوں نے امریکہ اور ایران کے درمیان حالیہ جنگ بندی کے فیصلے کو عالمی امن کے لیے خوش آئند اور مثبت پیش رفت قرار دیتے ہوئے حکومت پاکستان اور سیاسی و عسکری قیادت کی دانشمندانہ اور جراتمندانہ کاوشوں کو زبردست خراج تحسین پیش کیا۔

(جاری ہے)

انہوں نے کہا کہ موجودہ ملکی و بین الاقوامی حالات کے تناظر میں یہ جنگ بندی نہایت اہمیت کی حامل ہے۔

ممکنہ تصادم کے نتیجے میں تیسری عالمی جنگ کے خطرات منڈلا رہے تھے۔ انہوں نے مزید کہا کہ پاکستان نے متوازن، فعال اور موثر سفارت کاری کے ذریعے نہ صرف اس بحران کو ٹالنے میں کلیدی کردار ادا کیا بلکہ خطے کو ایک بڑے سانحے سے بھی بچا لیا ہے۔ پاکستان کا کردار اس بات کا واضح ثبوت ہے کہ وہ ایک ذمہ دار ایٹمی ریاست ہونے کے ساتھ ساتھ عالمی امن کا حقیقی ضامن ہے۔

تنظیمات اہلسنت پاکستان کے قائدین نے کہا کہ بھارت جو پاکستان کو دہشت گردی سے جوڑنے کی کوشش کرتا رہا آج خود عالمی سطح پر تنہا ہو چکا ہے جبکہ پاکستان نے امن، استحکام اور مذاکرات کی راہ کو فروغ دے کر دنیا میں اپنی مثبت شناخت کو مزید مضبوط کیا ہے۔انہوں نے مزید کہا کہ پوری پاکستانی قوم اس کامیابی پر مبارکباد کی مستحق ہے، جس نے ہمیشہ امن، برداشت اور اعتدال کا پیغام دیا ہے۔حکومت پاکستان نے جس جرات اور حکمت عملی کے ساتھ اس نازک صورتحال میں کردار ادا کیا، وہ قابل تقلید ہے۔ پاکستان کی کامیاب سفارت کاری نے مشرقِ وسطی کو ایک بڑے جنگی بحران سے بچایا ہے۔