Live Updates

آبنائے ہرمز بند ہونے سے دنیا کی معیشت پر برا اثر پڑا ،تر کاروبار ٹھپ ہو کر رہا گیا، محبوبہ مفتی

ہفتہ 11 اپریل 2026 21:23

سرینگر (اُردو پوائنٹ اخبارتازہ ترین - این این آئی۔ 11 اپریل2026ء) بھارت کے غیر قانونی زیر قبضہ جموں وکشمیر میں پیپلز ڈیموکریٹک پارٹی کی سربراہ اور سابق وزیر اعلیٰ محبوبہ مفتی نے کہا ہے کہ آبنائے ہرمز بند ہونے سے ساری دنیا کی معیشت پر انتہائی برا اثر پڑا اور تمام تر کاروبار ٹھپ ہو کر رہا گیا لہذا پوری دنیا نے امریکہ پر زور دیا کہ بات چیت کرے جس میں پاکستان کا ایک انتہائی اہم کردار رہا ۔

کشمیر میڈیاسروس کے مطابق محبوبہ مفتی نے ضلع کولگام میں ایک عوامی اجتماع سے خطاب کے دوران کہا کہ گوکہ یہاں مقبوضہ جموںوکشمیر میں پاکستان کا نام لینا بہت مشکل ہے اور ایسا کرنے سے ڈر لگتا ہے مگر کہنا ہی پڑے گا کہ پاکستان کاایک اچھا کر دار رہا ۔پوری دنیا تیسری عالمی جنگ کے دہانے پر پہنچ چکی تھی اوریہ جنگ کو پاکستان نے رکوائی ۔

(جاری ہے)

انہوں نے کہا کہ گو کہ اس وقت جو جنگ بندی ہے جس کی کوئی پائیدار ی نہیں ہے کیونکہ اسرائیل کا جو بددماغ وزیر اعظم ہیںوہ کوئی بھی شیطانی کام کرکے جنگ بندی کو نقصان پہنچا سکتا ہے لہذا ہمیں دعا کرنی چاہیے کہ یہ جنگ بندی برقرار رہے اور مذاکرات میں ایران کو فتح ملے کیونکہ ایران کی فتح مسلم امہ کی فتح ہے اور ایران کے رہبر اعلیٰ آیت اللہ خامنہ ای نے جو قربانی دی ہے اس نے شعیہ سنی کی تفریق مٹا دی اور انہیں یکجا و مربوط کیا۔

محبوبہ مفتی نے مزید کہا کہ بھارت نے کشمیریو ں کو ایک بڑی جیل میں محبوس کر رکھا ہے ، یہاں کے نوجوان کو جکڑ کے رکھ دیا گیا ہے اور جو کوئی بات کرتا ہے تو سیدھا جیل پہنچ جاتا ہے ۔