بجلی فی یونٹ ایک پیسہ سستی ہونے پر مونس الٰہی کا ردعمل

فارم 47 لیگ کی حاتم طائی کی قبر پر لات! بجلی کی قیمت میں اکٹھی "ایک پیسہ" فی یونٹ کمی، اس "عظیم فیصلے" پر قومی سطح پر جشن اور نوبل پرائز تو بنتا ہے؛ سابق وفاقی وزیر کا بیان

ساجد علی بدھ 6 مئی 2026 17:16

بجلی فی یونٹ ایک پیسہ سستی ہونے پر مونس الٰہی کا ردعمل

لاہور (اُردو پوائنٹ اخبارتازہ ترین۔ 06 مئی2026ء) پاکستان تحریک انصاف کے رہنما اور سابق وفاقی وزیر مونس الٰہی نے بجلی کی قیمتوں میں معمولی کمی پر حکومت کو آڑے ہاتھوں لیتے ہوئے اسے شدید تنقید اور طنز کا نشانہ بنایا ہے۔ تفصیلات کے مطابق سوشل میڈیا پلیٹ فارم ایکس پر جاری کردہ اپنے ایک بیان میں پی ٹی آئی کے رہنما مونس الٰہی نے بجلی کی قیمتوں میں حالیہ معمولی کمی کو عوام کے ساتھ سنگین مذاق قرار دیا، انہوں نے موجودہ حکومت کو 'فارم 47 لیگ' کا نام دیتے ہوئے ان کے ریلیف کے دعوؤں پر کڑی تنقید کی۔

مونس الٰہی نے طنز کرتے ہوئے کہا کہ حکومت نے بجلی کی قیمت میں اکٹھی "ایک پیسہ" فی یونٹ کمی کر کے حاتم طائی کی قبر پر لات ماری ہے، ان کے بقول یہ کمی ریلیف نہیں بلکہ عوام کی تذلیل ہے، انہوں نے اس کمی کا حساب لگاتے ہوئے عوام کو بتایا کہ اگر کوئی صارف 100 یونٹ بجلی استعمال کرتا ہے، تو اسے ماہانہ پورے "ایک روپے" کی بچت ہوگی۔

(جاری ہے)

اپنے بیان میں سابق وفاقی وزیر اور پی ٹی آئی رہنماء نے اسے حکومت کا "عظیم فیصلہ" قرار دیتے ہوئے طنزیہ انداز اپنایا، انہوں نے نے وزیراعظم شہباز شریف کو نشانہ بناتے ہوئے کہا کہ "اس عظیم فیصلے پر تو قومی سطح پر جشن منانا چاہیے اور 'شوباز شریف' کا نوبل پرائز تو اب پکا بنتا ہے"۔

فارم 47 لیگ کی حاتم طائئ کی قبر پر لات! بجلی کی قیمت میں اکٹھی "ایک پیسہ" فی یونٹ کمی۔ یعنی 100 یونٹ کے استعمال پر پورے "ایک روپے" کی بچت۔ اس "عظیم فیصلے" پر قومی سطح پر جشن اور شوبازشریف کا نوبل پرائز تو بنتا ہے۔
— Moonis Elahi (@MoonisElahi) May 6, 2026

خیال رہے کہ حکومت نے بجلی کی قیمت میں صرف 1 پیسہ فی یونٹ کی معمولی سی کمی کا اعلان کیا ہے، نیشنل الیکٹرک پاور ریگولیٹری اتھارٹی نے مارچ کی فیول پرائس ایڈجسٹمنٹ کے تحت بجلی کی قیمت میں فی یونٹ 1 پیسہ کمی کا نوٹیفکیشن جاری کر دیا ہے، صارفین کو ایک پیسے فی یونٹ کا ریلیف مئی کے بلوں میں ملے گا، سینٹرل پاور پرچیزنگ ایجنسی نے مارچ کی ایڈجسٹمنٹ کے تحت فی یونٹ 27 پیسے اضافے کی درخواست کی تھی۔

دوسری جانب ایل پی جی کی فی کلو قیمت میں بھی صرف 31 پیسے کمی ہوئی ہے، اوگرا نے ماہ مئی کیلئے ایل پی جی کے سرکاری نرخ کا نوٹیفکیشن جاری کر دیا، جس کے تحت ایل پی جی کی فی کلو قیمت 303 روپے 81 پیسے مقرر کی گئی ہے، گھریلو سلنڈر کی قیمت میں 3 روپے 69 پیسے کمی کر دی گئی، مئی کے لیے گھریلو سلنڈر کی قیمت 3 ہزار 584 روپے 90 پیسے مقرر ہوئی ہے، اپریل میں گھریلو سلنڈر کی قیمت 3 ہزار 588 روپے 59 پیسے مقرر تھی، تاہم یہاں قابل ذکر بات یہ ہے کہ ملک کے کسی علاقے میں ایل پی جی سرکاری قیمت پر دستیاب نہیں۔