پاکستان سندھ طاس معاہدہ سے متعلق اپنے حقوق کے تحفظ کےلئے معاہدے اور بین الاقوامی قانون کے تحت تمام قانونی اور سیاسی راستے اختیار کرے گا، ترجمان دفترِ خارجہ

اسلام آباد (اُردو پوائنٹ اخبارتازہ ترین - اے پی پی۔ 07 مئی2026ء) ترجمان دفترِ خارجہ طاہر حسین اندرابی نے کہا ہے کہ پاکستان سندھ طاس معاہدہ سے متعلق اپنے حقوق کے تحفظ کےلئے معاہدے اور بین الاقوامی قانون کے تحت تمام قانونی اور سیاسی راستے اختیار کرے گا۔ ترجمان دفترِ خارجہ طاہر حسین اندرابی نے جمعرات کو یہاں پریس بریفنگ میں کہا کہ تمام آپشنز موجود ہیں، کچھ اقدامات پہلے ہی انڈس واٹرز کمشنرز کے ذریعے جاری ہیں، ہم معاہدے پر عملدرآمد کی مسلسل نگرانی کررہے ہیں اور دریائوں کے بہائو میں ہونے والی ہر تبدیلی کو ریکارڈ کیا جا رہا ہے۔

انہوں نے کہا کہ اس بات کو یقینی بنانے کےلئے تمام کوششیں کی جارہی ہیں کہ پاکستان کے حق کا ایک قطرہ پانی بھی کم نہ ہو۔ بھارت کے دفاعی نظام میں توسیع اور عسکری جدت پر تبصرہ کرتے ہوئے ترجمان نے کہا کہ پاکستان خطے میں بھارت کے سٹریٹجک توازن پر اثرات سے باخبر ہے۔

(جاری ہے)

انہوں نے کہا کہ پاکستان کی دفاعی تیاری اور ٹیکنالوجی کے حصول کے اقدامات اس کی مضبوط دفاعی صلاحیت اور بھارت کے مقابلے میں قابل اعتماد کم سے کم ڈیٹرنس برقرار رکھنے کےلئے کافی ہیں۔

ترجمان نے پاکستان کی جانب سے ایران اور امریکہ کے درمیان جاری ثالثی کوششوں کا ذکر کرتے ہوئے کہا کہ پاکستان پرامید ہے کہ جلد یا بدیر ایک معاہدہ طے پا جائے گا۔ انہوں نے امید ظاہر کی کہ فریقین ایسا پائیدار اور پرامن حل نکالیں گے جو نہ صرف خطے بلکہ پوری دنیا میں امن کا باعث بنے۔ ترجمان نے کہا کہ بدھ کو وزیراعظم محمد شہباز شریف نے آبنائے ہرمز میں ”پروجیکٹ فریڈم“ کو عارضی طور پر روکنے کے اعلان کو بروقت اقدام قرار دیتے ہوئے اس کا خیرمقدم کیا۔

وزیراعظم نے کہا کہ پاکستان ہر اس کوشش کی بھرپور حمایت کرتا ہے جو تحمل، کشیدگی میں کمی اور تنازعات کے پرامن حل کےلئے مذاکرات اور سفارت کاری کے ذریعے آگے بڑھائی جائے۔ ترجمان نے کہا کہ نائب وزیراعظم محمد اسحاق ڈار نے گزشتہ ہفتے اپنے ہم منصبوں سے رابطے کئے جن میں ایران کے وزیرِ خارجہ سید عباس عراقچی، کویتی وزیرِ خارجہ، اردن کے نائب وزیراعظم اور برطانوی وزیر خارجہ شامل ہیں تاکہ امن اور سفارتی حل کو آگے بڑھایا جاسکے۔

طاہر حسین اندرابی نے کہا کہ کمبوڈیا میں حراست میں لئے گئے 54 پاکستانیوں میں سے 49 واپس وطن پہنچ چکے ہیں جبکہ باقی تین بھی جلد واپس آجائیں گے۔ انہوں نے کہا کہ 27 اپریل کو کمپالا میں وزٹ ویزا پر غیر مجاز ملازمت کرنے کے الزام میں حراست میں لئے گئے تقریباً 85 پاکستانی شہریوں کے معاملے پر پاکستان کے سفارت خانے نے متعلقہ حکام سے رابطہ کیا اور ان کی جلد از جلد واپسی کو یقینی بنایا جس کے تحت انہیں واپس بھیج دیا گیا۔